歐倩怡談婚變被抨擊委屈喊足3日3夜 營養學碩士提供有用Keep Fit秘訣丨獨家
發佈時間：07:00 2024-10-15
5個月前，44歲的歐倩怡（Cindy）跟大她15年的郭晉安，分別於IG宣布分訊，震驚全城！回復單身的Cindy除復出為HOY TV節目《健康關注組》做嘉賓提供營養資訊外，更為一間大學當研究助理。考獲體育及運動營養學碩士學位，擁有英國營養學家牌照的Cindy更為讀者提供健康減肥秘訣。至於曾於訪問中談論離婚，慘被網民不停抨擊最令她耿耿於懷，更自爆好委屈喊足3日3夜。採訪：方騫平 攝影：譚志光
歐倩怡學以致用，以營養學家身分做嘉賓主持，提供健康飲食資訊，由於要有真實數據支持，笑言對一位口快快的人來說，是一個勒住條脷的訓練，「要經常提醒自己少說話多做事」。她又指記憶力大不如前，要花更多時間背稿。
均衡飲食最健康
提到女人幾多歲都愛減肥，有否中女Keep Fit秘訣？Cindy指40歲後肌肉容易流失，一定要做阻力運動，如每日慢跑或慢行30分鐘：「我盡量每晚跑街5K，緊記要拉筋。」另外，要調整飲食，根據健康飲食金字塔的原則(適量進食水果、蔬菜、魚及肉、蛋、豆類奶和奶製品5種基本食物種類)：「我戒甜20年，但澱粉質一定要有」，她又提供健康飲食小貼士：「冇一樣食物係最好或最差，最重要均衡飲食。」
嘆網上多假新聞
歐倩怡於2006年結婚後便退出娛樂圈，相隔18年重返覺得成個圈唔同晒：「唯有努力調整自己心態，少說話多做事做好自己，每個行業都係適者生存，好彩做運動都可以幫到減壓。」她坦言當日公開談論離婚，惹來連串負評好唔開心：「我真係喊咗3日3夜，覺得好心碎，努力咗咁多年冇俾人讚過，只換嚟一堆抨擊，呢啲唔係我想要嘅反應，我真係唔知自己做錯乜？覺得連呼吸都有罪。」歐倩怡唔畀自己再唔開心，「我諗唔到反應咁大，心態係自己嘅，咪調整到自己可以控制到嘅嘢，多謝大家關心。」
Cindy再補充，稱網上太容易暢所欲言，故有太多假新聞：「所謂知我為人嘅熟朋友，其實我完全唔『識』佢喎，坦白講我喺呢行10幾年，朋友都唔多個，尤其近年只係接觸學校老師及家長。」Cindy又堅稱事情已過去，已冇嬲郭晉安：「都冇嘢好嬲佢，冇話邊個委屈啲，大家之後都要努力生活啦。」她還以營養學角度形容目前個人處境：「營養學日新月異，每個國家每分鐘都有科學家，研究緊對人類有益及有害嘅物質，每分鐘世界在變，雖然係難，但自己都要每分鐘在變嚟適應呢個世界。」
慳得一蚊得一蚊
Cindy絕口不提贍養費問題，強調失婚後會更努力工作建立事業，唔會再似以前戀愛大過天，對於曾發表急搵錢交租，「等錢使」言論，Cindy澄清被曲解了意思：「我係指成個經濟氣候唔好，大家都辛苦，我都係香港人，事業都係啱啱開始要靠累積，都要努力搵錢。」她再強調自己有瓦遮頭，食得飽亦着得暖，「不過，喺慳得一蚊得一蚊原則下，即使續咗車保都決定賣車，應使得使應慳得慳嘛。」至於會否全面重返幕前？她表示要睇機會：「因為高學歷識演戲、後生靚女太多，競爭太大，我反而想學以致用。」
