星8卦丨「媳婦仔」賣慘其實最陰濕細佬冇陪飯被KO懵然不知

更新時間：11:30 2024-11-15 HKT
發佈時間：11:30 2024-11-15 HKT

有時真係唔好睇表面，日日對住以為真係一家人？其實好似簡單嘅環境偏偏最複雜。好似「媳婦仔」咁一直畀人印象客氣、驚青又有禮貌，但咁多年落嚟，賣慣慘嘅佢心理唔係好平衡，平時現真身都唔係人咁品。喺劇組因為有啲勢力，加埋角色都係蝦蝦霸霸，而且係老屎忽，所以都擺阿姐款，得閒無事就要叫大家陪飯，好多唔係有背景嘅都要唔返屋企同「媳婦仔」去趁。

相關閱讀：星8卦丨「組織」出街食飯成日搵着數俾人唱單獨各自各又變正常人

偏偏「細佬」唔知死，平時唔睇清形勢就算啦，連續兩次都唔喺「媳婦仔」啲飯局出現，令到「媳婦仔」覺得唔畀面，於是發功整鬼佢。「細佬」漸漸見到啲戲份越來越少，而且劇本人設好唔掂，乞人憎又討厭，走去問監製導演，被冷言冷語對待又得唔到答案，唔使太耐，佢就被通知角色將會消失冇得撈。

「細佬」初時都唔知死喺邊㗎，後嚟同樣喺劇組出咗嚟嘅同佢講死因係唔畀面「媳婦仔」，先至知道呢個表面全部二打六做主角嘅地方，除非係上頭空降落嚟客串下，好似「妹妹仔」咁就冇事，如果唔跟潛規則玩，就只有死路一條！

其他文章：

星8卦丨「姣精」害「直男」形象全毀正牌炮友「咸濕」偷笑甩身

星8卦丨「唱將」生完仔復出搵錢扭擰揀Job計劃再生幾個

星8卦丨「青筋面」耍手段擦「福伯」鞋攞大獎人緣心地差依然冇運行

星8卦丨「大隻」以為嫁硬「才華」被拋棄搵個男人扮結婚激將法害自己下半生

星8卦丨「凍凍」為生活畀「書生」嫌棄遇「英俊」搭棚呃身家苦命女人

↓立即下載星島頭條App↓