星8卦丨「細細」為家計捱苦老竇唔同情揭發真正身世情緒崩潰

更新時間：11:30 2024-12-20
發佈時間：11:30 2024-12-20

「細細」都係苦命，成世人基於一個心念為咗頭家要賺好多錢，因為每次拎錢返屋企老竇就有啲好面口，嗰餐飯亦食得開心啲。親生阿媽好快又搵咗其他男人，掟低自己一個人，其他兄弟姊妹又唔係同一個阿媽，所以比較孤獨。

「細細」捱苦捱到食唔飽瞓唔夠，終於喺搵到啲錢存到些少私己就同老竇講要去讀書，點知老竇突然發爛渣，話咁多年如果唔係見佢仲有啲搵錢能力，一早就趕佢出門口，因為佢阿媽係大咗肚至跟自己，一出世就做埋親子測試，知道同自己冇血緣，咪當佢搖錢樹囉！奇就奇在「細細」竟然一啲都唔埋怨認錯多年嘅老竇，反而走去搵唔負責任嘅親生阿媽狼狼鬧咗一大餐，話畀佢害咗自己一生。

相關閱讀：星8卦丨「整容」送外賣送到嫁人生仔「小明」無懼被嘲笑娶妻一家和睦

「細細」最後離開咗屋企，飛咗去熱帶地方讀書，但人生路不熟加埋連串打擊，「細細」終於崩潰，畀房東送咗入醫院，冇朋友就更淒涼，如是者住咗半年，搵到幾個舊同事嚟接濟，從此「細細」啲精神狀態都麻麻地，尤其開親工就古古怪怪，近嚟知道情況嘅人都唔敢搵佢。「細細」啲錢畀老竇夾走晒，如果再冇工開，經濟都會出問題，所以有唔少有心人幫佢搵工作，希望有轉機啦！

相關閱讀：星8卦丨「嬌嬌」好命有繼父經濟支持做梅香激死阿媽諗計要阿女重新做人

↓立即下載星島頭條App↓