星級大搜查丨早婚=早分？情人節夫婦大考驗！伍富橋老婆控訴老公：諗太多 梁芷珮：老公長期匿喺廁所 專家揭維繫婚姻秘訣

情人節對情侶而言固然是佳節，對新一代的年輕夫妻來說，亦同樣是每年最重要節日之一。娛樂圈中不時有結婚、離婚消息傳出，當中被認為最易離婚的就是早婚夫妻，例如20多歲便結婚的周永恒與趙頌茹、和田裕美與前夫林恩浩等。趁著情人節，《星級大搜查》找來兩對圈中早婚夫婦代表，包括約27歲結婚、至今已婚3年的伍富橋夫婦，以及約20歲結婚、至今已婚21年的旅遊達人梁芷珮夫婦接受默契大考驗，並分享他們對「早婚易分」的看法。另外，亦請來心理學家李堅翔博士分享離婚的最大因素。

伍富橋自覺「事業未成」辛苦太太

伍富橋與太太梁兆楹（Shirley）年約27歲時結婚，至今已婚3年。兩人都是80後，以同年人來說，他們算是早婚一族。伍富橋接受《星級大搜查》訪問時指，曾計劃在35歲前結婚，如今比自己預想的時間早了不少：「所以辛苦佢（老婆）囉，冇諗過咁快，始終覺得事業未有一番作為，自己亦未係好成熟。如果要成為一個男人去擔起一頭家，希望佢畀多啲時間，包容我去改變。」二人皆認為早婚是對的選擇，強調「喺最愛嘅時候做呢個選擇係最好」。伍太梁兆楹說：「我都覺得結婚係需要衝動嘅決定，而且我哋仲後生，接受能力強啲，可以一齊磨合。」他們都認為夫妻之間最重要是目標一致，笑言「你話拍拖個時間係咪真係越長越好呢？我又覺得唔一定囉。」

相關閱讀：星級大搜查｜胸部豐滿易失平衡跌倒？娛圈「咪神」親解大胸的煩惱 脊醫：可致生骨刺

伍富橋不善社交感激太太「身教」

伍富橋與太太梁兆楹在TVB工作期間認識，兩人是娛樂新聞台的同事，當時伍富橋是娛樂主播，梁兆楹則是PA（製作助理）。梁兆楹坦言最初對伍富橋的印象極差：「工作上都會見到或者接觸，佢係明知佢見到你，跟住會下意識望地下。當時唔識佢就覺得佢個人都幾冇禮貌，我唔係逼你一定要同我打招呼，但佢係對到眼，跟住就避開喎。」事實上伍富橋個性內向，不善社交，「怕尷尬，打完招呼，轉數又唔夠快，又冇嘢諗到出嚟講，跟住就扮撳電話，扮見唔到囉。」伍富橋解釋，個性外向的梁兆楹令自己有頗大轉變，「見到佢同朋友傾偈或者出去社交應酬，潛言默化會學到，佢係一個好識得令我成長嘅人，同佢一齊之後，我覺得社交方面係進步咗，未係好好，但有進步。」

兩人之間互相學習、互相遷就是伍富橋與梁兆楹的相處之道，但身為公眾人物，難免成為網民討論焦點。梁兆楹生於富裕之家，伍富橋則生於小康之家，兩人的出身背景差異令他們經常備受網民關注，而這個問題對於早婚的他們來說，可說是三年婚姻的最大難關。伍富橋表示，曾經擔心太太會受網上輿論影響，包括曾經因一個IG post而被扭曲成「出軌」事件，當時他罕有地向傳媒解釋事件來龍去脈，並公開澄清：「依家冇嘢可以再影響到我哋，嗰件事都算最嚴重級別啦！對兩夫妻嚟講，講到『被出軌』，已經冇嘢可以影響到。」至於早婚是否易致早分？梁兆楹和伍富橋都齊聲表示：「現階段都冇擔心過離婚。」

相關閱讀：星級大搜查｜明星保暖靠打底？梁芷珮禦寒大挑戰 公開穿發熱內衣正確方法 呢種質地全球最保暖可抵負40度嚴寒

伍富橋與梁兆楹默契大考驗：

梁芷珮自小憧憬早婚

旅遊達人梁芷珮與老公Kenneth年約20歲時認識，拍拖一年多便決定結婚。兩人至今結婚21年，育有兩子一女。梁芷珮與丈夫Kenneth是旅遊達人，太太上鏡當主持，丈夫則負責掌鏡及影片剪接，兩人多年來合作無間。回想初相識時，梁芷珮指是經朋友介紹認識，初次見面就在卡拉OK，她說：「（當時）我覺得佢好型！」

梁芷珮21歲時便決定與Kenneth結婚，而且雙方家人亦非常支持，她坦言自小已嚮往家庭生活，「我由細到大憧憬都係一讀完書，18歲就隨時準備好可以結婚。」但Kenneth則與太太相反，笑言年輕時沒想過會早婚：「冇諗過，當時真係好細個，嗰陣我同我大仔而家咁嘅年紀。」對於早婚是否等同易離婚，梁芷珮直言不認同此說法，她說：「唔關事，你（結婚時）年紀比較大都可以離婚，視乎你與另一半如何維繫。」同時，梁芷珮與Kenneth亦表示不排斥子女早婚。

相關閱讀：星級大搜查｜唐詩詠麵包店被嫌貴 33 Cubread VS 人氣麵包店價錢逐個睇 直擊市民狂掃3百多元麵包

梁芷珮夫妻相處之道在於「見好就收」

梁芷珮直言，與丈夫在新婚階段幾乎沒有「磨合期」，感恩老公對她的遷就，而丈夫Kenneth則表示：「佢有咩意見我都會聽，最主要記住一句『Happy wife, happy life』。」另外，Kenneth亦不時為老婆準備小驚喜，梁芷珮說：「佢畀驚喜我多過我畀驚喜佢，譬如我冇風筒，佢就會買個風筒畀我，考慮周全。」梁芷珮認為，他們的婚姻之道在於每事溝通，二人笑言在生活上甚少有衝突，幾乎沒有吵架。

梁芷珮說：「我成日同佢講，要見好就收，所以我哋唔會點鬧交。其實你會feel到講邊啲嘢佢會唔鍾意，同佢結咗婚20幾年，其實你知㗎嘛！所以唔會講，唔好觸及佢會嬲嘅嘢囉！冷靜落嚟傾偈就冇事。」即使在子女的事情上想法不一，他們亦避免在子女面前爭論，梁芷珮說：「我哋喺小朋友面前一定要一致，儘管我哋背後有意見不同，傾咗先，再同小朋友傾偈。」

梁芷珮與丈夫重視二人相處時間

梁芷珮指，自己與老公的相處方式，亦可能會影響子女的婚姻觀。她說：「我同佢都雖然結婚超過20年，小朋友都大個，但我哋都sweet嘅，我哋會攬、拖手，咁令佢哋（子女）會覺得原來一段好嘅關係，係咁開心嘅，佢哋會feel到囉！」梁芷珮與Kenneth的最大興趣是旅遊和尋找美食，雖然兩人育有三名子女，但他們至今仍非常重視二人世界。梁芷珮說：「我覺得二人世界係真係好緊要嘅，雖然我哋成日飛，又有小朋友，但二人世界（嘅時間）係要自己搵出嚟。我哋會視工作都係二人世界，有時喺香港會放低啲小朋友，夜晚出去食飯。無論你結咗婚幾耐都好，你兩個都要有返啲私人空間，咁感情就可以Keep得非常好喇！」至於是否有信心婚姻可以白頭到老，他們都表示：「當然！」但若當關係觸礁，梁芷珮亦表示不介意大方放手：「如果佢要搵第二個，我就會『welcome go ahead』！」

相關閱讀：星級大搜查｜2024叱咤十大歌曲冇人識？街頭「接歌」大挑戰 學生驚訝姜濤得獎：唔太好聽

梁芷珮夫婦默契大考驗：

情人節默契大考驗  伍富橋夫婦默契更佳？

《星級大搜查》邀請兩對夫婦接受兩大考驗，包括「默契大考驗」及「夫妻大控訴」，考考這兩對早婚夫婦對對方的了解程度。《星級大搜查》準備了6條問題讓他們一同作答，最終由結婚年數較短的伍富橋與老婆梁兆楹以一分之差勝出。結婚21年的梁芷珮與老公Kenneth最終落敗，梁芷珮丈夫Kenneth表示：「唔可以用呢個分數來反映。」梁芷珮認為，他們其實在很多細節上對對方都相當了解，笑言「因為其實我哋內容都知㗎嘛，只不過係咪答返同一答案。」

相關閱讀：星級大搜查｜娛樂假新聞充斥社交網點分辨？市民靠兩招辨真假 瘋傳林愷鈴墮樓亡龔慈恩嬲爆回應

梁兆楹投訴伍富橋「諗太多」

而在接受「夫妻大控訴」考驗時，雙方都提出對伴侶的「不滿」。伍富橋太太梁兆楹說：「伍富橋個人諗太多，好多嘢人哋冇諗你咁樣，但你就覺得人哋咁樣諗你，跟住你就唔去做嗰件你應該去做嘅事。我覺得你應該諗少啲，做多啲，主動啲，個人就會開心啲。」伍富橋表示接受梁兆楹的意見，直言會好好改善。伍說：「自從同佢一齊之後，佢同我分析多咗，明白好多時，件事本身係好簡單，但我諗到好複雜。」至於梁芷珮老公Kenneth亦提出，希望老婆做事不要太急，避免太大壓力，梁芷珮亦表示接納老公意見：「我盡量無論喺講嘢、生活上、所有嘢都會慢返少少 。」

相關閱讀：星級大搜查｜啟德主場館開5萬人演唱會  哪位歌手期待值最高？ 張敬軒、炎明熹被點名

梁芷珮控訴Kenneth：唔好攞電話入廁所啦！

至於梁芷珮向老公Kenneth提出的控訴則牽涉不少男士的日常生活習慣，她說：「男人去廁所真係可以留到成個鐘，我希望嚟緊佢唔好成日去廁所得唔得呢？或者去一去廁所就出返嚟，唔好入去成個鐘啦！唔好攞電話入去啦！唔好喺入面睇波啦！」Kenneth回應時笑指太太要求多多，自覺有壓力需要利用在洗手間獨處時間來減壓，「咁我會唔會改善呢？未來應該都唔會。」

相關閱讀：星級大搜查｜明星忍大便記！陳家樂忍到生腎石 過度忍便可致肛裂 醫生教一招鍛鍊大腸控制便意

心理學家：婚姻長久與否視乎雙方成熟程度

臨床心理學家李堅翔博士接受《星級大搜查》訪問時指，其實早婚並非導致離婚的最大因素，而夫妻間最重要是需要有效溝通、聆聽對方感受。

李博士指，若要長久維繫婚姻，成熟程度及耐性是相當重要的因素。李說：「係咪可以成熟地做一個決定？經濟上嘅成熟，譬如知道幾時買樓、投資，點樣應該忍，點樣去溝通，呢啲好多情緒上、生活上嘅成熟都係嘅，耐性就更加緊要啦！因為好多時結婚同離婚都係一個衝動，如果嗰個人嘅心係比較穩定啲，係諗清楚先做，唔易畀情緒操控，咁就冇咁容易離婚。」

李博士引述美國著名婚姻心理學家John Gottman提出維繫關係的四個要點：「對伴侶唔好去批評、唔好鄙視、唔好成日防衛、唔好冷暴力對待伴侶。」當雙方有衝突時，建議大家設身處地去看事件，李又說：「或者諗吓，其實對方點解會嬲呢？喺對方角度睇，發生咩事，同理心好緊要。覺得原來大家都痛苦，轉移吓，唔好再執着誰對誰錯，真係去解決大家之間嘅問題，面對、接受、處理同放下，所有感情問題，逃避都係解決唔到。」

相關閱讀：星級大搜查｜我們的2024年娛樂圈最爆事件簿！呢位男星被捧為年度最爆藝人 《東張》女神首選「何伯何太之亂」

婚姻及家庭治療師：早婚夫婦正急速成長易有壓力

婚姻及家庭治療師李詠恩亦接受《星級大搜查》訪問，分享早婚與遲婚人士，面對的婚姻問題有何不同。李詠恩表示：「從臨床經驗觀察，部份年輕夫婦會想增加同愛人相處嘅時間，或者希望盡快離開原生家庭而早婚，容易忽略婚姻的意義，同家庭責任的重量，容易衍生很多期望落差、分歧同磨擦。」而由於大部份人在30歲前，會從家庭、社交、工作經驗、教育程度、職業發展等方面急速成長，同時亦會為他們帶來一定心理壓力。

年輕夫婦若同時面對自己或者伴侶的性格、心理狀態的改變、家庭經濟壓力、夫婦磨合或初為人父母的挑戰，壓力亦可能會降低夫婦間的耐性及包容度，因而更易出現衝突。至於30歲以上人士，普遍對生活方式、夫妻相處、家庭計劃有不同想法，李詠恩表示：「年紀較成熟嘅夫妻主要面對價值觀磨合，期望溝通同點樣規劃可以滿足雙方家庭生活。」

相關閱讀：星級大搜查｜藝人MBTI真實個性大揭秘！羅天宇恐懼社交極度怕人 關心妍：蔡一智私下好XX｜有片

你又有哪些維繫夫婦感情的秘訣呢？適逢情人節，《星級大搜查》祝大家情人節快樂，願天下有情人終成眷屬。