李珊珊揭與錢嘉樂分手原因 想將百萬后冠送往博物館做集體回憶：唔通放喺棺材咩丨獨家
發佈時間：07:00 2025-02-25 HKT
47歲「傳奇港姐」李珊珊20年前突然在娛圈「玩消失」，直至2017年證實患上驚恐症。最近珊珊終於戰勝病患「復出」幕前，為自資的網上平台《三坐山Mount Trio》做主持，不過，神隱近8年的她身形暴脹，雖然沒有了昔日的36E曲線美，但珊珊唔care外表，堅持(嚿屎)舊事已沖走了，亦不留戀港姐光環，甚至繼續爭取將當年價值138萬的后冠做慈善拍賣，再唔成事的話，日後就會捐給香港文物博物館做集體回憶，坦言：「留嚟做乜呀？唔通放喺棺材咩？」
李珊珊因驚恐症、濕疹、甲狀腺問題停工
18歲的李珊珊當選港姐冠軍兼奪「最上鏡小姐」、「最受傳播媒介歡迎獎」及「才藝小姐」，更被封為「史上身材最好的港姐」，曾出過兩本寫真集。2005年穿上蛇皮性感泳衣拍纖體廣告，震撼度更成為熱話。近年珊珊受到驚恐症、濕疹甲狀腺低問題困擾停工，幾經辛苦才企返起身走出幕前。
李珊珊可控範圍內做節目
今次李珊珊投資了多過5位數字經營集銷售、推廣、直播的多功能平台，好有挑戰性：「患病期間收埋自己7年，期間會追睇YouTube 節目，覺得好啱自己發揮，喺可控範圍內有信心、想做嘅嘢，尤其《神醫請坐》由治療我7年嘅精神科專科醫生主講，所以好有溫度，希望令有情緒病人及照顧者有更多認知，甚至唔識嘅人會有更多了解，而唔係隨意安慰兩句『堅強啲』『睇開啲』『諗多咗』，呢啲幫唔到件事反而有反效果。」
李珊珊搵到方法跟病共存
當日病發時她會肚屙、噴射式嘔吐、標冷汗、呼吸困難、休克、心跳加速，感覺似臨死邊緣，幾年後也曾鼓起勇氣想行出來幾次，可是總會有沙石及障阻：「試過跑步keep fit跑裂咗條腳筋要休息3個月，咁樣畀嘢擋一擋令我好沮喪，𠵱家目標清晰就算爆屎渠一身屎，最多縮一縮都會向前行，唔會再畀佢玩我！雖然𠵱家外出仲係好驚，驚恐時會肚屙，但搵到共存唔影響到工作嘅方法，肚屙咪去公司隔籬嘅廁所，個廁所又乾淨用得安心…」問到健康狀況？她表示已減了8成藥份，覆診期由一周一次延至一個月，唯一因為甲狀腺低令體重不可控：「我只可以講，我會好努力咁工作及生活，呢個角度想畀大家睇到，『今日嘅我唔等於明日嘅我』，我會好好成長，大家慢慢睇，以前點fit，過咗去就係過咗去啦，人生好似一本書，𠵱家本書多咗幾頁，要懷緬可以上互聯網睇，否則我招呼唔到。」為了營運公司，她以健康放在首位，已戒凍飲戒煙。
李珊珊談與錢嘉樂分手原因
李珊珊不多留戀昔日4料港姐光環：「留戀嚟做乜呀？去印度種蕉呀？不過，都多謝帝國時代嘅香港小姐深受尊重，每次出去有好待遇，不時參與慈善活動。」9年前珊珊趁住當選港姐20年紀念日，曾宣布義賣港姐后冠做慈善，最終因牌照問題不成事，時至今日她意願不變：「我冇打開個盒超過20年，唔會用㗎喇！咁留嚟做乜呀？唔通放喺棺材咩？后冠唔會跟到我身，加埋4個心口針及權杖好大盒㗎，所以交咗畀阿媽放喺保險箱保管！」珊珊甚至構思下個方案，如果再拍賣唔到，日後就會捐給香港文物博物館：「唔通抵押咩？相對捐去博物館有意思得多，大家可以睇返代表上世紀香港嘅港姐后冠款式。」珊珊送出后冠不覺可惜：「呢啲係身外物，就算有咩不幸，佢哋爭飽佢，鍾意邊個就去拎唔關我事，朋友都可以拎埋一份，最重要唔好打交。因為一日港姐一世港姐，唔使靠呢啲留為紀念！」
另外，不婚主義的她冇拖拍3年，珊珊承認曾少年輕狂直認花心，好需要談戀愛的人：「我話冇少年輕狂就呃人啦，甚至有重疊過，但全部真心真意去愛並不欺場！」她反而慶幸有呢個經驗：「唔通臨老入花叢咩？人生3大遺憾事係少年得志、中年失業、臨老入花叢！起碼呢個階段唔會中招，至少知道自己需要啲乜，要好好活好呢世就得，唔好諗咁多，𠵱家要有漣漪先行第2步，會好好享受過程『你在選擇人；人亦能選擇你！』」重提當年跟錢嘉樂分手原因，珊珊開腔說：「大家都冇計劃，不知不覺就8年，緣份到盡頭就完，但人哋一家幸福也不用再提。(有冇後悔？)點解要後悔？情愛嘅嘢好難講。」重新出發的珊珊少咗包袱，甚至在節目中會不小心爆粗，樂得輕鬆自在。
採訪：方騫平
攝影：林賓尼
化妝、髮型：阿寶(ig：abc_ahbochan)
場地：三坐山
