60年代花旦險進鬼門關！因肺炎緊急入院驚見「肺花」急召腫瘤科醫生：體力已經好弱
發佈時間：10:00 2025-03-22 HKT
縱橫演藝圈逾70年、現年77歲的姜大衛（John哥）與76歲的李琳琳是圈中的模範夫婦，兩人結婚逾半個世紀，經歷不少風雨，姜大衛曾陪伴太太度過抗癌路，令夫妻關係昇華。近日姜大衛和李琳琳接受好友汪曼玲的YouTube頻道《快拍。曼鏡頭》的訪問，李琳琳驚爆月前曾因肺炎入院，差點逃不出鬼門關。
李琳琳於2011年曾發現患上大腸癌
李琳琳於2011年曾發現患上大腸癌，之後擴散至淋巴，姜大衛當時一度停工照顧愛妻，幸好經歷了兩年抗癌之路，終於康復。早前李琳琳罕有接拍以女同性戀為題材的電影《從今以後》，宣傳時被發現戴助聽器，她承認因年紀大聽力變差：「10幾年前中耳積水，幾個月就要抽一次耳水，長遠要裝條管道，不過戴咗助聽後就好啲冇裝到管。」
相關閱讀：姜大衛李琳琳慶50周年金婚！筵開六席開P咀嘴放閃 囝囝女婿圈中好友齊到賀
李琳琳驚爆月前曾因肺炎入院：
李琳琳月前因肺炎入院
姜大衛和李琳琳應好友汪曼玲邀請接受家訪，姜大衛大顯身手，親自炮製師承於許佩老師由五花腩秘製的名菜「大衛肉」。在節目上姜大衛和李琳琳邊食邊傾，汪曼玲坦言從姜大衛口中得知，李琳琳月前因肺炎入院，差點逃不出鬼門關。李琳琳說：「我係一個唔係好錫身嘅人，近呢幾年注意咗， 前排啲肺炎好勁，有啲人抵唔住都往生咗。我都唔知自己係咁嚴重，直到我去睇醫生嘅時候，醫生叫我即刻入院。」李琳琳續說：「第二日醫生同護士講，如果佢係第二個，就已經死咗，我先知原來係咁嚴重，醫生真係好有愛心，佢好知道我嘅身體底子，日日交代護士點樣同我用藥。」
琳琳稱當時由元旦日開始發病
姜大衛續說：「佢個肺嘅X光片直頭花咗，之前嗰邊都係花咗，另一邊本來冇咁犀利，但係今次都花埋，所以醫生即刻搵腫瘤科醫生，驚佢係啲唔好嘅嘢，好好彩原來唔係，係花咗，肺炎。」李琳琳稱當時由元旦日開始發病：「病到我入咗院，住咗6日，1月22日出院，但係個人體力已經好弱，肺炎好番，醫生叫我乖乖哋，唔好周圍走，推咗好多約會。」姜大衛當刻真的心力交瘁：「醫院又只可以陪到夜晚，又要顧住佢中午食乜，晚飯食乜，啲仔女又去探佢，不過都唔緊要，知道佢有好轉，可以出院大家都開心。」
李琳琳重提當日確診腸癌經過
重提當日確診腸癌經過，李琳琳說：「嗰陣我哋去驗身，佢冇事，但係醫生話我個腸有粒唔係咁好嘅嘢，化驗咗之後係腫瘤，本來都唔係咁嚴重，醫生為咗保險，將我腫瘤附近嗰10幾粒淋巴都拎去化驗，結果有一粒淋巴病變，搞到腸癌由第一期跳到第三期，所以要做化療。」姜大衛忍不住說太太經常拖到最後：「佢舊年都入過二次醫院。」李琳琳則說：「肺炎嘅次數都幾多，每到夜晚個人都會覺得慶慶哋，不過又唔係發燒，小便又覺得熱，所以我有好經驗，一到差唔多就覺得好似係肺炎，但係都係拖幾日先見醫生。」
相關閱讀：姜大衛預祝李琳琳76歲生日 曹永廉子女罕現身似足外公 顏值身高成焦點
姜大衛超強演藝家族：
李琳琳坦言有點對不起家人
李琳琳坦言有點對不起家人：「可能我太唔在乎，近排我都反醒咗，我老公好錫我，啲仔又好緊張我，佢哋緊張我仲多過我自己，所以近排都同佢哋講過幾次sorry，成日要對佢哋咁費心，我個人又執着同任性，又唔識做家務，得到佢哋咁錫我，真係好感動。」對於太太的任性，姜大衛笑說：「好彩我係曳而唔係任性，如果唔係任性對任性，晨早就分開咗。幾十年大家冇話一定要點，既然佢係咁樣，大家相就，我成日都講兩公婆係互相，我咪遷就佢多啲。」姜大衛亦曾說：「兩夫妻經過唔同階段，有激情、愛情、感情，而家係互相需要對方、唔可能冇對方嘅時候。我哋淡淡地、自然而然一直走嚟，唔強求都唔會放棄。」
姜大衛出生於演藝世家
姜大衛出生於演藝世家，父母嚴化及紅薇、繼父爾光是演員，兄長秦沛、同母異父弟弟爾冬陞、太太李琳琳、兒子姜卓文、女婿曹永廉、姪子姜文杰及姪女姜麗文皆是藝人。姜大衛4歲已入行做童星，1951年接拍的首部電影為一部國語片《別讓丈夫知道》，姜大衛1966年加入邵氏兄弟後，在大導演張徹賞識下，成《游俠兒》的男主角。姜大衛23歲時，更憑武俠電影《報仇》獲得《亞洲影展》「最佳男主角」，成為《亞洲影展》最年輕的影帝外，更是香港首位獲得該獎項的影星。不過姜大衛在1974年，事業高峰時突然宣布與李琳琳奉女成婚，當時李琳琳沒有穿上婚紗，以休閒打扮簽紙行禮，成為一時熱話。
