古天樂右眼視網膜穿窿 驚覺有「飛蚊症」 眼科專科醫生：可致永久失明
發佈時間：16:17 2025-04-11 HKT
古天樂昨日（10日）出席在文化中心舉行的「第四十九屆香港國際電影節開幕典禮」，同場有日本影后安藤櫻、廖子好、袁富華、導演中島哲也和導演張吉安等等，作為焦點影人的古天樂戴上太陽眼鏡示人，原來此舉並非與「型」有關。
古天樂驚爆受眼疾所困
古天樂在訪問中指近日受眼疾所困：「隻眼係有啲問題，右眼視網膜穿咗兩個窿！所以而家飛蚊症得好緊要、好多黑線飛嚟飛去，戴住眼鏡將環境變黑就冇咁嚴重。」古天樂稱目前正安排做手術：「手術前唔可以戴隱形眼鏡；術後頭一個禮拜要休養、又有段時間唔搭得飛機，都會影響到工作，所以而家仲安排緊時間。」
相關閱讀：古天樂聞杜琪峯未放棄《黑社會3》計劃︰我都想《星球大戰》拍到18集 籲以港片景點推廣旅遊業達雙贏局面
對於古天樂驚爆右眼視網膜「穿咗兩個窿」兼出現飛蚊症，香港眼科醫學院前院長、眼科專科醫生周伯展接受《星島頭條》的訪問，他說：「首先我哋要明白咩係視網膜，如果好簡單嘅一個比喻，我哋眼睛係一個影相機呢，前面就有鏡頭，以前嘅影相機咪有菲林嘅，視網膜就等嗰個菲林。嗰個菲林穿咗窿問題就會滲咗啲水落去菲林底嗰度，個菲林就可能會離咗位，我哋叫做視網膜脫落。當視網膜脫落、一離咗位之後，佢嘅營養就唔到啦，咁視網膜上便啲細胞就會壞死，即係等於個菲林走咗光咁，係一個好嚴重嘅病嚟嘅。」
周伯展醫生坦言：「如果唔及時得到醫治會永久失明，係嚴重㗎，所以要盡快睇醫生，咁我哋幫佢點樣做呢？如果佢未滲水、未脫落，剩係見到佢穿咗窿，我哋即刻用激光去修補，鞏固返個視網膜，情況好似我哋貼牆紙，個牆紙有啲地方想甩啦，我哋呢落返啲膠水黐緊佢。」周伯展醫生續說：「而家嘅激光好先進㗎喇，唔痛亦都冇輻射。到時候醫生就會用顯微鏡睇住做啦，如果你穿咗兩個窿，過程講緊係幾分鐘或者一兩個字左右，做完又唔使包住眼，就咁起身返屋企㗎。」
高危人士要定期check眼
但假如視網膜出現滲水和脫落的情況，周伯展醫生情況變得麻煩，需要進行手術：「呢個情況剩係用激光未必得，通常都要做一個大手術㗎嘞，要將入面壞咗嘅組織，包括一個叫做用玻璃體嘅組織攞走，然後將個視網膜擺返去原來嘅位置，跟住再用激光去黐緊佢，咁攞走個玻璃體呢，我哋可能要返一啲物質去扶住個視網膜。呢啲物質可能係用氣體，亦都可能用矽油（Silicone）嚟扶住個視網膜，呢個係一個大手術，可能需要一個鐘先可以完成。」周伯展醫生希望藉着事件，呼籲大家預防勝於治療：「因為未穿窿之前，我哋都可以查到係咪有呢個高危會穿窿，視網膜係咪薄咗啦，喺呢個時候用激光修補，所以呼籲啲高危人士要定期check眼。乜嘢叫做高危人士呢？除咗近視600度以上嘅人，三高人士，尤其係血糖高嘅糖尿病嘅人，如果佢已經叫糖尿上眼，就已經係高危啦，仲有又或者受過撞擊嘅人。」
視網膜穿窿或者脫落其中一個徵兆係飛蚊症
至於做完手術是否一勞永逸，不會出現復發？周伯展醫生說：「穿過窿即係視網膜代表本身係弱嘅咁，今日你可能穿兩個窿喺某一個位，聽日你可以喺第2個位又穿一兩個窿，所以定期都要check住架啦。咁我都提一提飛蚊症，視網膜穿窿或者脫落呢，其中一個徵兆呢就係飛蚊症，如果發現佢突然間多咗飛蚊，要盡快搵眼科醫生 check眼底嘞。另外個病徵呢，就包括有閃光啦。好似有人幫你影相咁樣，完全覺得無端端有閃光，好多時係從光嘅地方去暗嘅地方，入房嗰一下就見到閃光，呢啲都係一個警號。」
相關閱讀：九龍城寨之圍城丨日本票房衝破2億日圓 古天樂率領「城寨三子」赴日謝票 四字冧爆fans獲歡呼拍掌
古天樂入行30年經過：
古天樂頸椎亦曾出現問題
古天樂一直都身體力行支持電影業，除了投資開戲外，還會擔任演員，不時四出做宣傳，即使身體出現問題，古天樂都堅持頂硬上。古天樂早年在電影《明日戰記》中，與劉青雲肩負保護地球責任，每次出動都要穿上重逾33磅的裝甲打鬥，結果古天樂的頸椎出現問題，他曾訪問上表示起初他並不在意，沒想到頸椎痛竟然讓他整個右半身都麻痺了。古天樂完成工作後，立刻去醫院動手術，將兩節頸骨換成鈦金屬，不過他曾稱痛到難以忍受：「醫生問我痛到咩程度，由一至十級最痛，我話係十級，仲要係長期痛，痛嗰時要食嗎啡藥止痛，瞓覺都轉唔到身。」古天樂早年拍電影時也曾意外傷到眼睛，當時縫了8針，被醫生叮嚀眼睛以後不要見強光。
