李婉華撐偶像姜濤唔肥：佢好細個咋 不點名批某人「人肥戲屎口賤」 與王晶曾因《一舞傾城》結怨
發佈時間：19:00 2025-04-16 HKT
日前王晶在微博批評姜濤「人肥歌雞舞賤」掀網民熱議，網民反應兩極，其後王晶刪除帖文並改為批評姜濤歌迷指：「錯的是背後瘋狂的資本和師奶粉絲。」言論再惹怒「姜糖」，更連累女兒王子涵（原名王海榛）被「姜糖」狠批。日前「鏡粉」李婉華在直播中也力撐偶像姜濤，反擊王晶：「我唔覺得佢（姜濤）肥喎，點解啲肥人會覺得佢肥呢？我唔明，即係佢自己都肥，呢個係重點……我冇佢咁肥，我都覺得佢唔肥，一個後生仔做自己咋嘛！」更指月底便26歲的姜濤「佢好細個咋」，可見視偶像為兒子般疼錫。
李婉華為姜濤突發直播狙擊王晶
移加多年的李婉華過去多次出席MIRROR成員不同地區的應援活動，甚至欣賞MIRROR的演唱會，自豪坦認是「鏡粉」，更不時在YouTube節目為MIRROR的是非平反。日前王晶批評姜濤的言論，她亦有留意，更為了替姜濤說話而請本來生病的林子博突發開直播，提起姜濤被批評時表現激動，並重提過去被王晶批評是過氣四線女星一事。
相關閱讀：導演王晶突以侮辱性字眼鬧爆香港頂流姜濤：滾出娛樂圈 事隔半日刪文 姜濤疑以3字回應
李婉華為姜濤平反好激動？
李婉華曾與王晶隔空罵戰
李婉華曾因批評《一舞傾城》與王晶結怨，李婉華曾在直播中批評王晶製作的劇集《一舞傾城》常提着女角「賣處」，認為意識不良。卻被王晶反斥：「我一向很少為自己作品的被評論辯解，但這兩天看到竟找了一個過氣四線，一個走路（佬）黃絲十八線來批評，我激到笑！」李婉華事後呼籲王晶積口德，又稱王晶玩針對牽扯政治立場：「我對佢今次嘅反應好失望，痛心疾首，完全好難接受。」事隔近兩年再於直播提及王晶，李婉華稱呼對方為「老友」，李婉華表示：「佢稱呼我哋……我就四五六七綫，你（林子博）就十八十九二十綫藝人咁，呢個朵幾勁呀，要多謝佢嘅！」更指王晶刷存在感，「呢兩日好多聲音，有人就話係咪又有人想刷存在感呀，我都覺得係嘅！」
相關閱讀：一舞傾城丨李婉華怒斥「教壞細路」 王晶反擊過氣四線：TVB屎戲之王
李婉華斥王晶對姜濤網絡欺凌
李婉華指雖然不想令王晶刷存在感成功，但她仍然想在直播討論他批評姜濤一事，是因為看不過眼，她說：「佢一個50年代出世嘅人，即係都成70歲，走去鬧一個1999年出世嘅人，都做得佢個孫喇！我覺得點解你仲咁好火，呢啲嘢係咪你適合講㗎呢？就算要刷存在感都唔係咁囉，無論你鍾唔鍾意姜濤，呢個絕對係網絡欺凌！好唔合適，何必呢？」李婉華認為不應該低估在網上罵人的後果，對於姜濤疑似發文回應王晶言論指「得啖笑」，她表示：「我好安樂呀，我覺得佢嘅反應係非常健康，同埋佢大個仔喇！」
相關閱讀：導演王晶發文再踩姜濤？祝福姜濤有天身材健碩 責師奶粉絲捧出低下水平頂流
林子博：肥就代表冇才華？
林子博亦支持姜濤做自己，他認為王晶指姜濤「人肥歌雞舞賤」言論不合適，林子博說：「你如果話佢跳啲舞好三級，或者除晒衫只係得條底褲就話啫，佢又唔係，點解要鬧到咁狠呢，我諗嚟諗去都諗唔明！我重申我唔係姜濤粉絲，但都係睇唔過眼。」李婉華就表示非常欣賞姜濤的勤力，林子博認為姜濤肥並不代表沒有才華，「肥係咪就代表唔靚呢？或者肥就代表冇才華？我覺得唔係！」
李婉華21歲女大膽晒撫胸特寫照？
李婉華斥某人：人肥戲屎口賤
李婉華認為姜濤應繼續做自己，「後生仔做自己，佢好細個咋，廿鬆啲歲。我唔覺得佢肥，好過你成日減到自己好瘦，唔開心咁何必啫，做返自己，咁我先更加鍾意。」李婉華認為姜濤有受眾、多粉絲，不認為姜濤不減肥就是錯，反批評王晶只「食老本」，常重提娛樂圈舊事。她亦不滿王晶批評喜歡姜濤的女粉絲是「師奶」，她表示：「哇！佢真係得罪晒所有人喎！」更不點名批評某人，「『人肥戲屎口賤』就應該係形容某人，你唔好對號入座呀，我冇話你呀！」
