財爺須出狠招開源節流｜曾智華
發佈時間：11:37 2025-02-11 HKT
財爺波叔即將發表《財政預算案》，你話佢腳頭唔好又得，班數功力與前N任差一截又得，總之由佢接替曾俊華開始，「香港夾萬」就似生晒銹咁款不停漏水，搞足幾年仍在雞手鴨腳不知點封番個窿，更唔見佢有乜創新思維開拓水源。
無論係點，一年一度功課總要交，真係成身冷汗，點搞呢？其實財政司司長好大權，《基本法》規定佢擁有獨立權力，連特首都無法干預。故此政圈皆知，當年梁振英做特首，次次與曾俊華撼到飛起，但CY一直冇阿John符，因後者有晒規章保障獨立思考及行事。
財政司司長既然咁大權，當然全人類對佢有期望，要求年年交出新創意新思維，「令香港再次偉大起來」（Make Hong Kong Great Again），而唔係想聽你成個「家嫂」咁款，呻自己「巧婦難為無米之炊」。
公職人員應凍薪或減薪
如今，人人等睇佢點開源節流。未講開源，先講節流。香港回歸後並非第一次窮到燶，結果點？最快又見效係全港公職人員凍薪或減薪（包括公務員、醫管局、社工、教師……凡跟政府薪酬表出糧的全中）。
另外推出肥雞餐減磅，長期未填的空位，取消或凍結，反正2至3年皆冇人填，「藕」係度等乜？
人同此心，立法會根本唔使咁多議員，下屆理應減半再減人工，千祈咪「諮詢」佢哋，自身利益攸關，必反對，問都多餘！
停止或延遲花上天文數字的龐大工程，香港並非唔夠地，只係畀少數人霸晒，當佢哋發覺霸佔N年仍無利可圖，自會嘔返出嚟。
開徵旅遊稅 吸盡博彩稅
又等我亂咁提議嚟開源。第一是香港人旅遊成癮，每年幾千萬人次出出入入，絕對唔會因要畀多一百幾十唔出唔入，加呢方面的稅，無大肉痛。
第二是政府建築物，可商營化的盡用，包括賣廣告，租部分畀人做生意。
第三是盡吸博彩稅，香港從來是個大賭場，炒樓炒股炒期指皆天文數字。唔好扮道德話加多幾日賽馬或開籃球博彩乃「鼓勵賭博」，再講會引智者發笑。暫時講住咁多先。
資深傳媒人 曾智華
相關文章：
投機者揚言炒樓更勝美債 回報5厘 李聲揚：「動物本能」一旦出現 樓價或真正見底
關稅戰拖延減息進度 美股震盪停不了｜晉佳
