龍躉大王細女 22歲上車何文田千萬樓 從小落魚欄送貨 拒認富二代 「一直以為自己係勞動階層」
發佈時間：06:00 2024-01-20
早前小紅書跟抖音有條熱爆影片，22歲女就買入價值千萬的單位實現到可能很多人追求大半世的上車夢，更加創業開按摩店，引起網民熱議，說她多得有個富爸爸。《星島頭條》找到這位女生，她名字叫Serena，其父親就是人稱「龍躉大王」的吳伯恩，賣龍躉賣到街知巷聞，加上投資有道，買樓又買舖，資產過億。不過Serena則不認為自己是一位「富二代」，坦言「我覺得我屋企冇十幾億都唔敢話自己係富二代。 」其實這位千金小姐有著非一般的經歷。
從小到大衣食無憂、年僅22歲就已經上車買入千呎單位，Serena坦言小時候不知自己生於富裕家庭，「以前覺得家人都係普通打工仔勞動階層，唔覺得自己特別家庭富裕， 身邊嘅朋友同同學長大，大家開始都有一個上車嘅煩惱仲有搵工， 我就開始發覺我家人係俾咗個好好嘅基礎我，而呢個基礎真係唔容易。所以我就開始明白，原來我家庭係好幸福，已經比好多人好。」
基礎有多好？就是22歲已買入何文田一個千呎單位，價值千萬，家人支付大部份首期，而供款就要靠自己，「爸爸話認真工作搵份工，踏實一點 ，一定供得起嘅。」可能從小在具投資眼光的父親身邊耳濡目染，相比大家一窩蜂湧去新盤市場，Serena偏選擇舊樓單位成為她人生中第一層樓，其中一個主要原因是空間較大，「一般新盤客廳，其實你拖地幾下就已經拖完 ，可能爸爸覺得我新樓住唔慣太細啦！」
從小幫手家族生意
對於樓價下跌，業主們都心慌慌，不過她就平常心面對， 說出一番見解，「講真，何文田呎價九千幾蚊，有電梯都唔會跌得去邊，如果佢都跌，啲新樓一定跌得仲甘，都冇得話幾時最高 幾時最低，我又唔係用來投資，自住唔會有太大影響。」
Serena由小到大生活無憂，但如果覺得她是溫室小花就大錯特錯，因為她小學時期已要落魚檔幫手送貨收銀，「十幾斤嘅貨都要自己送去銅鑼灣，坐地鐵去送貨送完之後返舖頭收錢。 」長大後就要到爸爸酒樓做侍應，再大一點更做過葵涌廣場兼職銷售員，工作經驗豐富。
從小就要幫忙家族生意，當然要犧牲玩樂時間，找錯錢、玩電話更加會被媽媽責罵，「成日同我講，你玩電話帶唔到錢比你，做所有事都要認真！爸爸媽媽其實係以身作則，細個當然唔明白呢個道理，但大個之後就覺得好啱。 」
創業開按摩店 租金最高峰16萬
父母灌輸的思維直接影響Serena賺錢的觸覺，2020年，年紀輕輕跟胞姐於太子開按摩店，雖然舖位都是爸爸名下，不過「親生女都冇情講」 要準時交租，「我們租金係又升又跌，如果生意差最低都要交8萬蚊租金，16萬係封頂。 」
萬事起頭難，更何況在疫情初期開業，遇到困難更加多，起初每個月都要蝕數萬元，「真係好大壓力，又徬徨又唔知幾時先係盡頭，不過爸爸都會以過來人身份同我講說唔使太擔心。」最終捱到見曙光，現時店舖已陸續有盈利，但Serena坦言，通關後港人北上按摩直接對生意造成影響，會繼續尋求方法求變，例如加推優惠、保持服務質素，希望可留住客人。
店舖現時主力由胞姐打理，還要上學的Serena 一星期會盡量到店舖兩至三日幫手，她透露每個月個人有約3至4萬元的收入。
作為Serena強勁後盾的吳爸爸是何方神聖？下集我們跟吳爸爸即是龍躉大王做專訪，坐擁億萬身家，為何還要日日親自劏魚，他指住自己額頭的皺紋，「你睇到我額頭就知我係有故事嘅人啦！」記得密切留意下集訪問。
---
【上車驗樓，星島搵專家幫你手！如果你有新盤驗樓、裝修分享，請即Email：[email protected] 】
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
