旺角洗衣街變天 新地新商廈規模如朗豪坊 專家睇好 料帶動租金爆升100%
發佈時間：13:20 2024-03-08
過去一年香港迎來，自由行普遍集中於旺角朗豪坊附近消費，東面的洗衣街一帶仍相對淡靜，雖然已減少吉舖情況，但較高峰仍相差一段距離，不過該區將迎來轉機，新地去年3月以47.29億奪標的旺角洗衣街「巨無霸」商業地，已向城規會申建1幢53層高商廈，項目將打造成旺角「Green Heart」，成為一個綠化及可持續發展的大型綜合新商業地標，料於2030年落成。盛滙商舖基金創辦人李根興表示，項目將為旺角東帶來極大影響，料租金將爆升80%至100%。
項目潛力無限
旺角上一個大型項目已是2004年落成的朗豪坊，李根興認為項目發展潛力無限，「香港發展到靚商場得三個發展商做到，新地、太古同九龍倉，尤其新地商場通常係最靚、人流最多、宣傳最好！好在呢塊地皮落喺新地手上，一定會搞靚個商場。所以當時新地一投標，無論價錢幾多都好，佢搞得旺角商場，周邊地方都會帶旺，恭喜晒附近嘅業主！仲要係區內最大型項目，喺呢個最核心地方興建，當然睇好呢度要重本揼落去！」
料租值爆升一倍
李根興指出，參考各區過往大型商場落成後均帶動周邊街舖租金，「朗豪坊落成後，旁邊上海街、砵蘭街；時代廣場落成之後，旁邊波斯富街、羅素街租金都係癲咗，當時未落成時代廣場之前都冇人識羅素街！而呢個大型項目落成後，一定會將整個人流由西洋菜南街一帶東移過來旺角東呢邊，大家入商場購物之餘經過外面條街，小食店或零售店都必須要有，有部份店舖入唔到商場，就會選擇街舖經營，廣告效應都會較大，所以預計租值一定爆升上八成至一倍。」
各核心區租值已逐步向上，尖沙咀海防道現時呎租約500至600元，廣東道市旺時呎租達1,000元，羅素街更加高達3,000元。而現時洗衣街租值仍偏低，李根興位於洗衣街商舖正在放租，「面積約880方呎，如果日後已八萬元租出，呎租大約100元，因為而宜對面係地盤，但隨着項目落成我相信呎租上到200元至300元一啲都唔難。 」
形容附近業主：一係死心，一係貪心！
現時洗衣街附近仍有不少吉舖，李根興指出主要是業主兩個原因，「一係就死心，一係就貪心。早前疫情係死心，咪將舖位好平租出去，但而家所有核心商舖租金由低位上升幾成，甚至係兩三倍，不過較高位仍然相差六至七成，好多時變咗業主貪心，反正都等咗三年，唔爭在等多幾個月，等自由行越來越多，免稅額亦有望提升，可以叫高價錢，包括我自己都係呢個心態，所以核心區叫租都相對硬淨，貪心就係因為嚟緊睇好呢區市場，所以就可以解釋到點解咁多吉舖。」
他續指，早前中環皇后大道中最後一間吉舖都已租出，所以吉舖將會一直慢慢消化，租金之後就會隨之回上。李根興透露於洗衣街一帶持有5間舖，他表示隨着項目帶旺該區吉舖將會消化，如果價錢合適的話會再增持，今年計劃買8億至10億元商舖，約40至50間，六成位於核心區，四成會在民生區。
新地工程管理部策劃總監麥啟華指，項目地盤面積約12.4萬方呎，最新設有1幢樓高53層、另連6層地庫及3層平台的商廈，樓高320米，是該公司繼ICC後全九龍第二高商廈，將提供約120萬方呎寫字樓樓面，以及20萬方呎商場樓面。
相關文章：
地皮開標｜新地47.29億奪旺角「巨無霸」商業地 每呎樓面地價3103元
陳茂波：洗衣街發展項目非「賤賣」不會因短期市場波動影響土地穩定供應
---
【上車驗樓，星島搵專家幫你手！如果你有新盤驗樓、裝修分享，請即Email：[email protected] 】
《星島申訴王》推出全新項目「區區有申訴」，並增設「我要讚佢」欄目，現誠邀市民投稿讚揚身邊好人好事，共建更有愛社區。立即「我要讚佢」︰ https://bit.ly/3uJ3yyF
想睇更多精彩內容，請立即瀏覽「區區有申訴」活動專頁，https://bit.ly/41hgS9E
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
