古天后日誌｜港股陰乾慢落試前底找支持
發佈時間：11:55 2023-09-21
9月21日，大致天晴，日間天氣酷熱。隔晚美國聯儲局維持息口不變，聯邦基金利率續處於5.25厘至5.5厘，符合預期。不過聯儲局就大降明減息預期，由6月減1%預期下調至減0.5%，美股先高後低。道指跌76點；標指跌41點；納指跌209點，跌幅較為顯著。由於明年降息預期縮水，不利以融展發展業務嘅科技股，科技股自然跌幅較大，至於標指則落到4,400點，有機會再下試4,300點至4,350點支持，此關不容有失，否則會出現較大幅度調整。
留意聯儲局言論係繼續放鷹，因為要繼續打擊通帳，聲明暗示今年仍有機會加息一次，至少明年減息幅度，由6月預估減四次變成兩次，至於2025年仍維持會減五次，2026年減四次。雖然減息預期下降，但GDP則由6月時預測增長1%，上調至2.1%，2024年則從1.1%上調至1.5%。GDP較預期強勁，反映美國經濟陷入衰退危機大減，亦係美企業績表現好過預期嘅原因。
鮑爺表示，預計8月核心PCE將回升至3.9%，全年維持3.7%左右，明年降至2.6%，2025年跌至2.3%，非常接近聯儲局2%目標，並重申堅決維持通脹要降至2%。最後亦提到維持每月縮表950億美元不變，並對美國銀行體系穩健有信心。至於近期的長息上升，鮑爺話跟通脹預期無關，主要係供求關係改變，導致價格下跌，過去3個月財政部合共拍賣近7,500億美元新債券，供應增加令美債價格下跌。
人民幣續疲弱 不利中港股市
議息後美匯指數喺105水平徘徊，中美息口進一步拉闊，人仔重返7.3水平保持疲弱。目前中國持有美國國債降至8,218億美元，去年中美貿易順差達到3,829億美元，但中國外匯儲蓄只有輕微增長，反映期內有大量美元流出，有消息指中國減持美債係為咗買人仔支持匯價唔再進一步回落。另一個原因係外資澈離令美元流走，未來中國仍要面對美元流入減少，但流出持續增加，局住繼續減持美債。內地減少美元儲備下，離岸人民幣資金池體量不變，人民幣保持續疲弱，不利中港股市表現。
明日輪到日本央行議息，行長植田和男9月初曾表明，若央行對物價及工資持續增長有信心，結束負利率屬可行選擇。上次議息則修訂YCC，今次如再「放鷹」，仍會為市場帶來震盪。不過隔晚夜期跟ADR仍然處於萬八樓下，人仔弱勢或拖累中港股市走勢，今日若失守17,800點，日線保力加通道底17,650點左右係即市支持，但之前都講咗失守17,800點，向下試前底17,500點機會大增。加上噚日成交只有712億元，陰乾向上格局未變，唔少人怪我成日唱淡講股，但一個欠缺資金入場，成交薄弱嘅市場，唔係我個人力量可以唱得淡，資金說明一切，身體永遠最誠實。
---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
