古天后日誌｜城投債危機比內房更大鑊 望阿爺開會助港股反彈
發佈時間：09:43 2023-12-06
12月6日，早上大致多雲，局部地區能見底較低，有一兩陣驟雨，稍後漸轉天晴乾燥。隔晚，美國就業數據轉弱加劇市場對經濟前景憂慮，美股周二個別發展，道指一度下滑近200點，收市跌幅收窄至79點，納指反覆做好，全日升44點；標指跌2點。
新能源車龍頭Tesla股價一度升4.7%，收市升幅收窄至1.3%；蘋果公司抽高2.1%，市值重越3萬億美元，亦係表現最強道指成份股。不過市場憂慮經濟前景，資源股受壓。但從虛擬貨幣市場睇，市場風險胃納並未見下降，比特幣重上4萬美元大關，升逾6%至4.4萬美元水平。
雖然美國勞工部職位空缺及勞動力流動調查(JOLTS)顯示，10月份職位空缺由9月向下修訂嘅935萬個，大減至873.3萬個，屬2021年3月以嚟最少，並遠低於預期930萬個，就業市場疲軟，令市場更加相信明年或提早減息。美國10年債息應聲而下，跌至4.155%；息口敏感嘅2年期債息亦降7.93個基點，至4.556%。
至於中港股市噚日繼續倒水，穆迪噚日將中國評級展望由「穩定」降至「負面」，令人民幣一度受壓，A股上證指數收市跌1.7%，滬深300指數更大跌1.9%。其實中國被降低展望評級實在唔意外，目前中國正面對巨大內房債危機，繼去年內房債爆雷後，今年又輪到城投債出事。
4月貴州城投債率先爆雷
城投債務危機相對內房債爆雷更大件事，今年4月貴州自爆還唔到城投債，驚動中央。中央一直唔容許地方政府從商，原因係唔想地方利用公共財政去補貼投資，但無政府帶頭投資，就無法帶動當地經濟發展，最後中央默許地方政府以投資公司名義進行投資，呢個係好耐以前嘅政策，而呢啲有政府背景嘅投資公司所發的債，正正係城投債。目前所謂中國基建，大剖份由地方政府嘅城投公司名義融資進行投資，官員上任為期5年，呢啲官員為咗自己任期內有成績，就不停借錢大搞基建，結果投資公司投資嘅項目，大部份係無經濟效益嘅大白象工程。
今年4月貴州城投債率先爆雷，差少少違約，更自爆根本沒力償還債務，事件驚動中央，由於地方總債務已超過100萬億，中央亦無可能全數包底，因此中央定性城投債屬於公司債務，地方政府唔可以用公共財政幫手包底。結果引發出城投債危機，城投債出現再融資困難。咁去年內房債爆雷，內房企業已乏力投地，今年再到城投公司無力投地，地方政府財政更緊拙，結果9月陸陸續續傳出沒法支付公務員薪金等消息，呢個亦係中央繼今年3月份放水後，再喺11月發行1萬億特別國債，放水畀地方政府解決出糧問題，外資急急腳走人，大量資金流出A股，正正因為係見到阿爺一再放水只能填氹，一再放水都未能流入經濟實體，即係經濟復甦增長受阻，外資自然一去無回頭
穆迪對上一次下調中國信貸評級展望係2016年3月，及至2017年5月再將信貸評級由「Aa3」降一級至現時嘅「A1」。當時上證指數反而由2,700點低位升上被正式下調評級前嘅3,300點，故相信今次可能都係短暫衝擊。本月稍後時間中國將召開政治局會議及中央經濟工作會議，若然政策面定調積極，港股就有條件反彈。
---
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
