必定又再「屍橫遍野」｜曾智華
更新時間：16:06 2024-10-17
發佈時間：16:06 2024-10-17
發佈時間：16:06 2024-10-17
字體大小
凡颱風來臨前，政府有關部門尤其是天文台及消防處，必定再三警告市民，切勿滑浪甚或走近岸邊。點解？唔該上網睇睇凡颱風襲港時，巨浪可以撲到幾高？你唔識死，就被捲走，瓜硬嘅事，請勿累人救你！
大鱷對撼 股市巨浪滔天
其實股市都一樣，上周癲到幾千點上落的日子，你作為散戶，有乜資格跳入去同大鱷玩？真的想用舌尖試利刀？
一日破紀錄幾千億上落，指數狂升狂插，邊個有能力搞成咁？當然是國際級大鱷在對撼，賭一鋪大嘅，於是造成股市巨浪滔天。
小弟觀股市幾十年，仍是第一次見到咁勁景象。當然自己知自己事，收手唔買唔沽睇吓「大戲」先。不過此時仍有不少散戶心癢手痕，覺得冇理由唔玩，尤其無知之輩，被搵食經紀猛游說下，怦然心動。
上周二我在土瓜灣坐小巴出旺角，本來冇留意隔籬買餸位師奶電話講乜，但佢越講越興奮，旁邊乘客唔聽唔得。
師奶話：「係呀，我世侄做證券經紀㗎，話呢輪好多客發過豬頭炳，猛叫我快啲開戶炒即日期指，有殺錯無放過，因一日上落千幾二千點，若果買中升或跌，一日已可發達呀！反正成本唔多，若勢色唔對，立即平倉即可。你聽朝得唔得閒，一齊上佢公司玩吓好唔好？」
睇佢個款，都幾肯定在游說另一位師奶炒即日鮮期指。講講吓，目送佢喺公屋何文田邨落車，唉……真係弊。
太多散戶貪心又無知
小市民、打工族、師奶仔，儲一百幾十萬何其困難？但狂風巨浪時走去「玩浪」（炒期指），真係一日就可以打靶。
不過市場有太多既貪心又無知的散戶水魚，被利益相關者（例如狂賺你佣的經紀）說兩說，又冇專業知識，就咁簽文件，即時開始被撳。
鱷魚潭絕對大食細，大戶掌握資訊、大量智囊、擁新科技、經驗豐富、賭本雄厚，加上毫無血性心狠手辣，更擅用金融工具出擊，在股市中根本就是個巨人；散戶則只是螻蟻水魚，你想在巨人手指罅中賺大錢？唉唉唉，發夢冇咁早，繼續下去，必有另一次屍橫遍野。
資深傳媒人 曾智華
相關文章：
