認購新股絕非我杯茶｜曾智華
發佈時間：06:00 2024-10-22
從前有位國際著名投資智者講過：「我不會認購任何新股，購入的必定是上市3至5年，有表現的才會吸納，價錢當然會高一點，但不會買錯。好股當然年年增長，絕不會只好幾年。」
小弟百分百認同這原則，故除了經營多年的公用股外，私人公司申請上市的從不認購。這是否大智慧？絕對不是。其實從簡單記錄看，尤其是近年香港新股往績，顯示認購新股何其不智。
遠的不講，單單計由今年6月28日開始上市的20間公司，直至上周四，居然有13間公司跌破招股價，能浮上水面的僅得7間。當中卡羅特（2549）及百望股份（6657），分別只較招股價高5%及2%，即隨時會潛水。
元續科技超購2,500倍也潛水
那麼大大超額認購的股份，又是否成為「火箭股」呢？答案不是！最大倍數認購的元續科技（8637），誇張到超購2,500倍。結果又如何？揸咗的必定喊到收唔到聲，因已經跌咗近6成！
超額認購龍虎榜第二位的是，超額1,300多倍的卡特羅。上市初期曾係威係勢升近6成，結果好快食瀉藥，如今只有不足6%升幅。
下半年至今認購邊隻最抌心抌肺呢？正是中贛通訊（2545），揸咗直頭要喊到叫阿媽，因如今跌咗7成多。
作為小小股市觀察者，小弟絕對無意倒港交所（388）米、阻上市公司搵食或阻散戶發夢會發達。只不過近幾年太多人問我意見，既然問到又幫到老友，咪清心直說囉。講完後，你自己執生去唔去馬認購喇。
前兩日幾位老友問：「碌Sir，你有冇認購華潤飲料（2460）呀？應否抽返幾手博上市即爆升嗎？」
同是呢幾丁友，對上一周才力插華潤咁大個集團，連歷史悠久嘅華潤堂都做唔住，輸俾屈臣氏及萬寧。同一集團的飲品股上市，點解竟存有毫無基礎的期望呢？憑乜認為佢上市會升？
小弟見佢「細細粒」，但竟需要4間證券集團做聯席保薦人，已覺有些「不尋常」。華潤飲料我冇幫襯過，冇認識，各位老友們，你又識幾多呢？
資深傳媒人 曾智華
相關文章：
憧憬減息 錯沽股票 債券今年跑輸大市近30% 「今年輸錢的 要深切反省」｜李聲揚
港股曾穿兩萬關 月內低位或未見 惟整體仍屬中期急升後調整｜郭Sir
