Mag7業績周 美股有調整風險？有個指標要留意｜晉佳
發佈時間：13:48 2024-10-29
美國大選當前，賀錦麗及特朗普二人選情五五波，至於參眾兩院由共和黨奪權呼聲較高，所以即使賀錦麗上場，施政亦會舉步為艱，於是Trump trade成為近日焦點之一。不過，Trump trade已進入超買狀態，投資者唔應該呢一刻先至加大押注特朗普上任。
大選後料不會即時見頂
距離美國大選只餘下一周，美股市況轉靜，觀乎周末伊朗及以色列形勢降溫，仍未為美股帶嚟刺激，短期嚟講，美股上升動力似乎不足，納指有可能等待出現一個約5%左右嘅調整，假如有調整，震走部分信念唔夠嘅投資者，後市會上升得更順暢。美國大選後，美股唔會即時見頂。
至於調整會唔會喺未來兩周內產生？其中一個因素係大型科技股業績期，微軟（Microsoft）、谷歌（Alphabet）、亞馬遜（Amazon）、蘋果（Apple）、Meta（META）今個星期內接連公布業績，不過，微軟、谷歌、亞馬遜嘅Call put ratio相當高，連日維持喺大約70:30水平，可以話投資者喺績前過度押注喺呢3隻股份嘅好倉，業績好，就會高開觸發好倉獲利盤；業績衰，好倉掟貨會進一步壓低股價，形勢對於短期市況略為不利。
長遠選擇微軟比谷歌佳
Mag7股份裡面，上述高call put ratio嘅3隻大股，喺之前一次業績期過後，股價都係跑輸大市，假如今次業績後股價出現調整，微軟及谷歌季度業績年度化市盈率將會比目前嘅34倍及22倍為低，屆時又有一定吸引力。
微軟雲端及商業收入比重較高，受經濟周期波動性影響較低，至於谷歌倚賴YouTube、Google廣告收入，難免同經濟周期齊起齊落，兩者估值差異屬合理，二者選中，微軟長遠係較佳選擇。
所以，想吸納大型科技股嘅話，尤其微軟、谷歌、亞馬遜，比較適宜業績後先搵位低吸。
晉佳
相關文章：
趁市旺執倉 清貨換馬6大原則 「一定要有決心 見到唔掂就要清倉」｜林本利
港若跟美按息升「供平過租」恐又將消失 後市還看租金走勢及人口流動｜李聲揚
港股成交金額縮小 郭Sir籲觀望為妙 大市形態反覆欲試底｜郭思治
