美國大選前捱調整 等下周撈貨｜晉佳
發佈時間：17:27 2024-10-31
踏入大型科企業績期，美股開始調整，如上期所述，由於微軟（Microsoft）、谷歌（Alphabet)及亞馬遜（Amazon）等大股call put ratio非常高，有大量資金喺績前作好倉部署，績後平倉誘因十分大，於是今晚星期四受周權準備結算嘅因素影響程度亦較大，壓力不輕，目前，美股期貨下跌約1%，估計全晚會收陰燭。至於星期五晚周權結算日，或許仍會偏軟，然後迎接下星期大選、聯儲局議息及就業數據。
早前資金炒起Trump trade概念，近期唔少人估計特朗普上任呼聲高。不過，美國總統選舉結果往往難測，而大眾對於賀錦麗抑或特朗普上任嘅分別，睇得太劇戲性，長遠而言，無論邊位上任，政策分野未必有想像中大。
政綱最大差別在稅務政策
目前二人政綱對股市影響最大差別，莫過於稅務政策，賀錦麗計劃上調企業稅率，由21%上調至28%。至於特朗普計劃增加對華關稅。表面睇，差異很大。
不過，參眾兩院有機會由共和黨把持，倘若賀錦麗上場，加稅計劃肯定面對參眾兩院重大阻力，至少加稅會一拖再拖，然後大幅度被閹割，加稅會唔會由7個百分點縮小到2個百分點？機會肯定大過加足7個百分點。若然加企業稅不如預期，又可能轉而喺對華關稅開刀，變相賀錦麗變得更特朗普，不足為奇。
由於二人邊個上任嘅差異冇想像中大，市場可能高估大選結果帶來嘅波動性，於是大選結果揭盅，市場波動性減低壓低期權市場引伸波幅，好友購買力降低，大市或會下跌。於是，唔排除美股偏弱走勢，會反覆持續到下周二。不過，當本周五就業數據、下星期二大選、下周四聯儲局議息，一切因素反映後，就係中短線撈底嘅唔錯時機。
晉佳
https://www.patreon.com/user?u=28525578
相關文章：
趁市旺執倉 清貨換馬6大原則 「一定要有決心 見到唔掂就要清倉」｜林本利
港若跟美按息升「供平過租」恐又將消失 後市還看租金走勢及人口流動｜李聲揚
