晨光追擊│「 知足常樂」大熟大勇
發佈時間：15:51 2024-10-31
一如平日的周四晨課，今朝出跳馬此起彼落，大部分參戰馬均進行試跑，當中甚多勇馬。現將所見報道如下：
「友瑩仁」戴頭罩由助手跳兩段，岳頭但唔搶口，薄身馬收身結實唔覺瘦，出腳步挺急勁有力，現時狀態大熟大勇。「特別美麗」戴頭罩由助手跳兩段，試來精神奕奕展現朝氣，外觀好睇，毛色悅目烏卒卒。「先到先得」戴眼罩由助手跳兩段，越見淡定內斂，而且好輕身，甚有好感。
「上校」助手拍「儀琪之寶」跳兩段，全程拍住走，試來有火有力，馬身收得好靚，持續態勇，老當益壯。「包裝明駒」戴頭罩由潘頓跳兩段，清風送爽完成，勁之餘但唔急，蓄勢待發。「知足常樂」戴頭罩由助手跳兩段，毛色好靚金光閃閃，走勢爽朗有勁，狀態大熟大勇。
領航傳祺持續態勇
「威武年代」戴頭罩由希威森跳兩段，毛色唔太靚，不過好內斂好淡定，落腳又夠輕快，態無不妥。「辣得金」艾道拿跳兩段，前腳一貫出得直，細馬收身實淨，火力亦見充裕。「領航傳祺」戴眼罩及頭罩由副練跳兩段，火力未減半分，走勢硬朗有勁，馬身收得結實，持續態勇。
「精明選擇」戴眼罩及頭罩由潘明輝跳兩段，放鬆快慢由人，灰馬身飽滿，近況極理想。「盈妍威楓」戴頭罩由助手跳兩段，神態活躍展現朝氣，馬身保持壯健，銳氣正盛。「穿甲戰鷹」戴頭罩由希威森跳兩段，展步開揚有勁，神態活躍，外觀省鏡身色都好靚。
「果然僥倖」班德禮跳兩段，神色好番好多，唔再頹唔再重身，看其表現似有轉機。「城中勇士」助手跳兩段，戴頭罩，步伐穩健力度唔差，馬身收得壯碩，毛色油潤悅目，外觀引人。「鐵三角」戴頭罩由助手跳兩段，急口唔規矩乃指定動作，然而身色都靚，狀態對辦。「英勇快車」助手跳兩段，仍戴雙杆型口鐵但唔再急口，試來神采飛揚，贏開更醒神。
「金牌活力」戴頭罩由董明朗草地跳兩段，神情集中，步挺利落力度不弱。「過關大師」梁家俊拍「南莊堡」巴度草閘跳兩段，前駒步穩力度唔錯，馬身收靚有線條美；後駒戴面箍，仲有少少急口，不過款頭極佳。
兆文
