晨光追擊│「文明福星」贏馬出頭

晨操動態

更新時間：16:00 2025-01-25
發佈時間：16:00 2025-01-25

每個時代都有出色良駒，比較邊駒是最勁無意思，因為永遠都不會有答案，「嘉應高昇」所擊敗的無疑是路程不合的「驕陽明駒」，但一再打破紀錄時間實在犀利，仲要每一次都係按韁之下造出。

旋風飛颺弗到爆燈

「旋風飛颺」今仗改配布文。

第二場第五班一四○○米草地：「旋風飛颺」上季三歲馬已兩度扳上一哩，今季操足初出跑一千米熱身，前仗首度出戰同程即交出好表現，因為該仗排十三檔起步，之後一直留到尾二，由於步速快有利衝刺，留到咁後無有怕，可是去到二百米展開勁勢衝刺之際，「極速之子」斜跑阻去「旋風飛颺」路線，繼而要轉位出外邊衝，若非如此兩駒名次已調轉。

「旋風飛颺」上仗吼準千四再戰，這次排十檔走位大同小異，然而步速偏慢不利後上，至弊是眼見大局已定，潘頓騎得求其。今次「旋風飛颺」改配布文照計繼續留後，然而計馬評分極具優勢，更吸引剛周一試從化千六閘，末段自動波追上弗到爆燈，即使跑法被動照樣追捧。

文明福星勁揪到痹

「文明福星」再出戰千四。

第六場第四班一四○○米草地：「文明福星」今季首三戰都改動配備，前仗唔使再變，十二倍開跑無之前咁冷落，反映幕後開始有信心，雖然最後三甲不入，但跑第五輸兩個半馬位進步唔少，更吸引的是稍稍領先佢的「非凡達」，之後連贏兩場兼征服三班。。

「文明福星」上仗首度扳上千四出戰，檔差留鬥無可厚非，遇上慢步速亦非自己能控制，不過直路上希威森的決策太差，唔肯直走順住內邊衝，堅持要走出外邊，結果先係受困，之後就算有位，也只是「線路神驊」、「棒棒糖」中間的窄位。同時也因為位置太窄，令到希威森好遲取得平衡，難得最後追獲第四，仲要差不多同過終點的「皇仁歡星」再出贏三班賽，呢席殿軍勁揪到痹。

兆文

↓立即下載星島頭條App↓