社區的事｜SEN少女確診自閉輕度智障 母親「放得低」成就女兒摘金畫家夢
發佈時間：07:30 2024-03-14
本港近年頻頻出現「照顧者殺人」事件，原因均與壓力爆煲有關，尤其照顧SEN（特殊教育需要）小朋友，家長要全天候照料，當中辛酸不足為外人道。20歲自閉兼輕度智障的趙彩琳憑童真畫功，近年屢在展能藝術賽摘金，並推出個人畫展及於今月慈善步行籌款攤位展示作品，全靠「背後的女人」趙媽媽默默支持，她笑言女兒是完美主義者兼管家上身，感謝母女相處多年教曉她放下，寄語同路人「唔好太勉強小朋友，唔好畀自己太大壓力，有困難就要講。」
「記得有一年帶佢去中環睇醫生，係一個言語治療師的訓練思考課，突然間我喺街上仆咗落地，當時彩琳眼定定望住我冇反應，無要扶我起身嘅意思。」彩琳媽媽回憶道，身旁的女兒像玩記憶遊戲般，突然連環爆出「2012年！黃姑娘！9歲！」彩琳媽媽苦笑「嗰陣我傷心咗好一段時間，但係SEN小朋友就係咁，個個（狀況）唔同，佢一年見幾次都認唔出舅父，我慢慢就放低咗，只會諗下點教佢學識關心人。」
現年20歲的趙彩琳，出世時並無異樣，直至入讀幼稚園K1班時，老師發現她離群及經常躺臥地上，於是建議趙媽媽安排女兒詳細檢測，結果證實患有自閉傾向及輕度智障，肌張力較同齡孩童低下，即維持身體某個姿勢、控制肌肉上較其他人辛苦，經常表現懶散、趴在桌上、身體扭來扭去等狀態，需要定期透過運動鍛鍊以增加肌肉力量，同時要進行語言治療、職業治療、心理輔導等訓練以改善病情。
彩琳需時排期入讀特殊學校，初小曾在主流小學短暫度過2年，其間彩琳媽媽發現女兒出現揑爛書角、狂捽手指、亂畫課本等壓力性反應，「老師話佢情緒唔太穩定，默書默得好困難…嗰陣時我覺得好辛苦同迷惘，唔知點樣可以幫到佢。」畫畫成為彩琳的唯一解壓方式，她可以專心致志在畫冊上2、3小時亦不覺得累，慢慢積累成為其人生閃光點。
至2016年，彩琳潛能正式湧現，2016年獲視藝班老師鼓勵報名參加新晉展能藝術家「藝無疆」公開賽，首度在兒童組奪冠，相隔2年後新作品再於同一比賽的青少年組奪冠，至2023年在賽馬會創意藝術中心正式推出個人畫展，彩琳媽媽見證女兒的成長與變化，「佢以前同人講嘢唔太望人，嗰次畫展為公眾人士蓋印仔以及畫自畫像時，佢唔抗拒同陌生人互動，某程度要多謝視藝老師，畀彩琳表達主動性，現場想擺乜嘢作品，個設計應該係點，完全當佢係一個普通人咁看待。」
現時彩琳打開與外界溝通的渠道，今月24日獲邀參與「藝遊‧香港」港島慈善行，與其餘6名有不同障礙程度的藝術家，透過藝術作品在山頂夏力道至盧吉道步行徑打卡點中展現維港特色，目標為香港展能藝術會籌款，其間彩琳再與公眾人士互動，期望可以進一步開拓她的社交圈子。
透過不斷人生訓練及經驗累積，彩琳媽媽笑言女兒現時像一個完美主義者兼管家化身，「佢畫畫會不斷追求完美，畫錯一條線會扔十幾張畫紙重新畫；平日有工人姐姐照顧佢，但姐姐逢周日放假，佢學識周日自動洗衫、晾衫及執衫，連邊個扔少咗一件衫都會知，連讀緊觀塘展亮課程老師都讚佢執貨好有規律同整齊。」
回想走過的路，彩琳媽媽認為作為一個SEN兒童的母親，做事要學懂放低及求助，「我時時刻刻擔心佢的將來，又驚佢唔識保護自己，但唔好太勉強小朋友，唔好畀自己太大壓力，唔好比較自己同人哋（SEN子女），最重要係有困難要講出嚟，人哋未必幫到你，但可以互相鼓勵…神覺得你能夠應付到先會畀你。」彩琳向媽媽莞爾一笑，突然爆出「約爸爸，要食午飯！」室內傳來陣陣笑聲，彷彿人生未曾出現半點苦澀。
--------------------------
《星島申訴王》一周年生日送大禮，正舉行問卷調查，參加者有機會獲得足金串飾、Rasonic 電飯煲、英皇電影禮券及一田超市現金券，點擊答問題贏大獎：https://bit.ly/3P4s70j
《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ
