傳與家燕姐女兒拍拖王梓軒新劇喜見「外母」

頭條日報-娛樂

更新時間：20:48 2015-06-19
發佈時間：00:00 2013-11-21

       月前王梓軒與經理人兼緋聞女友，薛家燕女兒石祐珊搭住膞頭親熱閒遊銅鑼灣被記者撞破，嚇得小戀人急急彈開，認真冇癮！女友咁避忌，無非都係想保住男友飯碗，唔想影響其事業。而咁啱，王梓軒拍TVB賀歲喜劇《新抱喜相逢》時，會與「緋聞外母」家燕姐拍攝，戲中梓軒大顯身手，打人兼被打，搞到腳都痹兼拉傷埋，唔知經理人珊珊有冇呵番呢？採訪：方騫平
      王梓軒在新劇中飾演一位有野心，口甜舌滑擅於奉承的高材生，因不甘心在公司屈居大少（麥長青）、二少（敖嘉年）之下，所以同爸爸（安德尊）謀奪家產。當日場戲講奸到出汁的王梓軒要策動爭產行動，明明識得玩boxing，但就裝作被打，趁麥包唔在意時乘勢追擊，將佢打落地，最後兄弟反目收場。
      拍攝前梓軒先做熱身，又跟對手試好位，確保唔會出錯：「因為學過詠春，所以打拳難唔倒我，唯一最怕演戲經驗唔多，走位時誤傷對手。呢套戲真係打到飛起，唔單只打麥包，仲打敖嘉年，又同武打前輩秋姐（元秋）同羅莽對打，連續幾日拍打戲，搞到依家腳麻痹，又拉傷咗腳要睇跌打。」
      王梓軒一邊拍戲，一邊仲要出show宣傳新曲《萬夫莫敵》：「試過有一次以為場戲拍完，最終畀錯咗反應要重拍嗰場戲，搞到對手麥包同滕麗名要重拍，唔好意思！（「外母」家燕有冇特別照顧你，畀咩意見你呀？）全部演員都有畀意見同支持我，家燕姐仲緊張過導演，會對我有要求，譬如話我眼神唔夠，要求我重新拍過，真係多謝佢哋體諒同指導，我感覺好似置身一個大家庭咁溫暖。」


■王梓軒在新劇中，與未來外母薛家燕有對手戲。