Executive日記——搭膊頭照兩女係朋友馮煒光憂變「天煞孤星」
發佈時間：00:00 2013-12-06
候任特首辦新聞統籌專員馮煒光，將於本月十六日履新，昨日網上就瘋傳佢同兩名濃妝艷抹女子嘅合照，照片所見，三人頭碰頭，其中一名女子衣着性感，馮仲將雙手搭在二人膊頭，惹來外界揣測。不過，馮煒光澄清，話呢張相係舊年一大班朋友喺台北晚飯時合照，背景喺一家台北飯館，兩名女性友人係OL，大家光明正大，佢仲將張相片放喺佢facebook超過一年，佢笑言，擔心今次事件令佢變咗「天煞孤星」，以後冇女仔敢埋身同佢食飯影相喎！
馮煒光早前丁父憂，現在身在內地，正同媽咪散吓心。可能快將做官，佢的一舉一動引起各方關注，尤其佢仍「單身」，所以俾人從佢面書上嘅相拿出來品評，佢話多謝大家關心，亦要向相中兩名台灣女性朋友致歉，事關當時只係朋友飯局，唔想呢兩位政圈外嘅女士受到不必要嘅影響。
唔介意活在放大鏡下
佢話，身為公眾人物，唔介意活喺放大鏡下，但大家「人肉搜索」佢嘅朋友，對佢哋唔公平，況且佢舊年認識呢兩位女士時，佢哋根本唔知佢係政圈中人，或會做新聞統籌專員。佢好無奈咁話，睇嚟以後冇朋友敢同佢食飯同影相。被問到佢會唔會就呢件事向特首解釋？佢話，特首好忙，相信唔會關心呢啲小事喎。
「光棍」專員感情生活Dry
現年五十一歲嘅馮煒光，仲係「光棍」一名，佢三年前曾撰文自爆搵唔到女友，感情生活好Dry，話曾有一段十四年嘅愛情長跑，但愛人結婚了，新郎不是他，又話好積極約會異性，奈何成日食檸檬。Kelly覺得，馮煒光貴為高官，月薪十八萬，點會冇女仔埋身吖。
有「爆咪姐」之稱嘅前傳媒人潘麗瓊話，馮煒光係佢讀港大時嘅學生會會長，工作好努力同認真，印象中當時佢有個要好女友，形容佢個人幾專一，仲話佢似乎鍾意眼大大可愛型嘅女孩喎。
Kelly Chu
