Executive日記——惡搞「拖手」停不了周永康岑敖暉互望好甜？

專欄

更新時間：18:49 2015-06-19
發佈時間：00:00 2014-10-09

       各區佔領運動未知幾時收科，學聯秘書長周永康同副秘書長岑敖暉係運動嘅靈魂人物，佢哋嘅一舉一動都成為焦點。唔少花生友就關心佢哋嘅感情生活，學聯就好幽默咁轉貼惡搞兩人「手拖手」漫畫回應，話「兵荒馬亂」，叫大家優先關注政制發展喎。
      歌仔都有得唱「男生們是非，我細細聲講給你……」不過，近日頻頻曝光嘅周永康同岑敖暉，佢哋嘅「是非」就無得細聲講，但就可以大聲笑。Kelly好多朋友成日打聽「學運男神」岑敖暉有無女朋友，佢有無女友Kelly唔多清楚，不過，佢同戰友周永康日日出雙入對，就引嚟唔少遐想。近日網上瘋傳一張兩人與黃之鋒站在台上，周岑笑望對方嘅照片，好多人都話佢哋笑得好sweet，紛紛恭喜佢哋，仲話黃之鋒似證婚人?，真係令人忍俊不禁。
      網民又爆發創意，全速製作惡搞圖，夾硬PS佢哋手拖手照片，仲有專頁分享兩人最新動向。兩人感情事廣受關注，搞到學聯都要回應，喺facebook轉貼一幅兩人手拖手漫畫，話「感謝各位朋友關注秘書長與副秘書長的私人關係，但兵荒馬亂之際，Alex（周永康）與 Lester（岑敖暉）希望各位能優先關注香港的民主發展。」據聞周永康有女朋友，但為保護女友免受外界滋擾，佢哋好低調。
      Kelly Chu