蘇永康大婚新娘Anita喊住嗌嫁
發佈時間：00:00 2014-12-03
恭喜！恭喜！昨日（2日）是蘇永康和時裝名牌高層女友Anita（馮翠珊）大婚日子，二人交遊廣闊，人緣極佳，星級兄弟團多達14人，令洲際酒店星光熠熠。新郎哥早上接完新娘後，隨即上花車在尖沙咀行大運，下午舉行的註冊儀式，莊嚴又感動，新娘子Anita穿上拖尾婚紗靚爆示人，輪到她宣讀誓詞時，Anita講講吓忍唔住落淚，老公即出手拍一拍太太腰肢，場面感人。之後蘇康溫柔為新娘揭開頭紗，喊到鼻紅紅的Anita和丈夫情深互望，然後齊做接吻魚咀足5秒，完成整個註冊儀式。想重溫蘇康的感人註冊禮，即上頭條POPnews啦！採訪 ︰ 袁東亮、沈灝南、陸旻昱
昨 日，蘇永康和拍拖8年的女友Anita拉埋天窗，早前蘇康已一擲30萬拉隊去拉斯維加斯拍婚照，一切以太太為先的蘇康為了豪華婚宴，使費不設上限。早上11時，14位星級兄弟團齊集陪新郎上酒店接新娘，蘇康先戴上寫住「我係老婆奴」的面罩，然後遮住雙眼在兄弟面上各寫一個字「ANITA I LOVE YOU 」再加個心心圖案，兄弟其後又做高難度瑜伽，順利幫好兄弟贏得美人歸。班姊妹要求新郎每人送一個Hermes鱷魚皮手袋做開門利是，之後又話要8萬8現金，不過新郎無咁多cash，竟畀咗張無銀碼支票，事後訪問時話「呢個老婆係無價」，冧爆身旁愛妻。
莊嚴又搞笑
下午2時許舉行註冊儀式，穿上簡約單膊拖尾婚紗的新娘子靚爆由父親挽住進場，據悉婚紗係由曾替英國皇妃凱瑟琳（Kate Middleton）設計婚紗、ALEXANDER MCQUEEN總設計師Sarah Burton度身設計，花費不菲。蘇康接過太太就上台，證婚人陳奕迅夫婦亦就座。婚姻監禮人就開始一場無宗教儀式的註冊禮，蘇康情深款款向太太宣讀誓詞時，Anita已眼紅紅，輪到新娘宣誓時，Anita嗚咽說出：「願以你蘇永康為我合法丈夫！」感動落淚。而交換戒指期間，蘇康拎住戒指想為太太戴上之際，新娘Anita伸出左手，表情疑惑，然後問監禮人：「係咪左手？」嘉賓即爆笑，監禮人亦幽默說：「係左手，少少蝦碌仲值錢呀！」台下女親友更爆句：「未嫁過，係唔識㗎！」令莊嚴氣氛變得輕鬆。
完成註冊儀式後，一對新人5時許挽手步出接受過百中港台記者訪問，蘇康就以廣東話和國語雙語回答，他先感激母親及長輩大手筆送鑽飾畀太太，問到婚後財政大權是否畀晒太太？Anita話之前一直都係。問到幾時蜜月旅行，二人異口同聲話因要忙外國Fashion week，最快要下年農曆年後才補番。至於婚後會否不設防及造人大計？蘇康笑說隨意吧！因太太的飛行里數仲多過自己，而Anita就幫口話希望下年多些時間留港，暗示加緊造人呢！晚上婚禮宴開50席，雖然蘇康透露天氣轉涼，有部份親友因病缺席，但星級賓客如張學友、容祖兒和謝霆鋒等，已陸續到賀，群星雲集，非常熱鬧。
