老馬有火夾埋159歲謝賢當眾爆粗摑曾江

頭條日報-娛樂

更新時間：04:11 2015-08-13
發佈時間：00:00 2015-08-13

同為粵語片年代紅小生謝賢（四哥）與曾江，被指積怨逾半世紀，終因合作無線節目《四個小生去旅行》爆衝突，四哥昨日在該節目的記者會上連番爆粗狂數曾江，更突然出手，隔著胡楓（修哥）怒摑曾江並拂袖而去！本報記者
謝賢、曾江、胡楓（修哥）及Joe Junior四位「小生」年齡合計共三百零一歲，夾埋有一百五十九歲的謝賢和曾江昨日就在出席四人合作的節目《四個小生去旅行》記者會時爆出衝突。
修哥當災
　　心情看來麻麻的四哥在會上頻黑面兼堅持待無線高層離場才受訪，他開腔即炮轟曾江在俄羅斯拍攝該節目期間全程要坐輪椅，質疑他獲優待及似有「玩人」之嫌。
　　四哥連環爆粗並突然激動地站起動手掌摑曾江，夾在兩人中間的修哥見狀即出手擋格，但不幸中招，眼鏡險告甩脫，全場譁然。四哥又指為該節目錄音時，被曾江埋怨「阻住收工」，當日已想打曾江，說罷就離開會場。
曾江：誤會多年
　　曾江事後承認與四哥「誤會多年」，但否認埋怨四哥阻收工。問到會否主動致電四哥？他稱不會亦覺得沒此需要，又直言四哥今次太衝動了。對於四哥指他詐病，曾江笑道：「我都好想，病好過癮咩？」
謝賢事後被問到是否盛怒才出手？他說：「唔嬲就唔會咁！我唔打佢（曾江）唔心息，我最唔鍾意啲人認叻。（不跟曾江做朋友？）唔係唔鍾意做朋友，都唔係O個種人。」無線高層曾醒明昨否認四哥動手摑曾江是宣傳招數。
謝四爆粗足本對白
謝=謝賢　曾=曾江　Joe=Joe Junior
謝：……係好開心嘅事嚟，但其中一個小生呢就跛嘅，就跛左O個個，你知邊個啦，唔緊要，你點樣跛法，我地都可以照顧你，但係，估唔到佢開工兩三日就要坐輪椅，都唔緊要，但係佢坐輪椅，由開頭一路坐到尾喎，咁中間，你估我地應該點照顧佢呢，感覺到係，佢有啲玩弄左我地，知唔知呀，係咪呀，好似，比如噚日我睇到報紙話佢流鼻血，流四個鐘頭，X你個X味，流四鐘你死X左啦
曾：流四個鐘頭呀
謝：咁你唔死？
曾：未死得囉，O個日一針之後停左啦
謝：即係流左四個鐘頭先去打針
謝：唔好講呢樣嘢（曾：好）你坐輪椅O個個……O個個……O個個……橋係咪度出嚟嘅呢？Ｘ你老Ｘ要我地成班人幾個輪流去推你，喂，唔使咁樣呀
曾：我都唔想O架，大佬呀，我想O架咩
謝：哦，你唔想？但我知道你唔係喎，我知道你好X活躍O架喎
曾：唔得，到而家我都仲係「屹」吓「屹」吓
謝：「屹」吓「屹」吓？好啦、好啦（曾：如果我咁好戲嘅……）總知，我話你聽，我知道你個人，多過佢地，啱唔啱先
曾：咁又係
謝：你唔好喺我面前耍嘢，我話你聽
謝：仲有呀！呢度唔講住，X你個X味！（謝賢突然站起動手）我噚日X你X味，喺……喺……喺……呀，呢個錄音室（曾：咩話？咩話？）你講過咩呀
曾：我講過咩呀
謝：吓？（曾：吓？我講過咩呀）
謝：你唔係一早……吓！你講過咩呀
曾：吓？我無講過嘢喎，我講過咩呀
謝：我喺度錄音嘅時候，你話「X你老X！我今日想早啲返屋企俾你拖……拖住晒！」
謝：（向記者道）因為噚日錄音呢，就四個人喺度嘛，四個人喺度錄，我因為好耐無錄過音，「幾幾屹屹」喺度，吖，佢喺度XX我喎，講完都唔緊要喎，仲要喺……我地四個坐喺度，佢仲要喺後面行嚟行去，行嚟行去咁樣，結果導演叫佢坐番喺度，錄音唔可以有聲行O架嘛
曾：有地氈O架阿老四
謝：地氈都唔應該行
曾：Okay Okay Okay，咁點呀？
謝：我就打你O架啦
謝：不過喺無線O個度就唔打你O架啫
曾：哦，喺呢度打我
謝：我邊度都打到你
曾：咁有乜問題呀？你打我有乜問題啫真係
謝：我我我，你都咁樣搞
曾：你使乜咁衝動啫
謝：我衝動？喺拍緊嘢嘅時候唔緊要，你知唔知呀，做嘢吖嘛，我一啲表現都未講過出嚟，X！但我知道你（手指曾江）X你老X！成Crew人去顧你O個個O個個O個架三輪車，唔X使講，總知你以後唔好見到我（話畢行出會場）
曾：咁又點啫？無咪無囉，使乜搞咁多，咁衝動啫，（向記者道）無無無，無事，無事嘅無事嘅，衝動咋嘛
Joe：真係無事
曾：有咩事啫
Joe：嚇死我，以為咩事
曾：因為衝動先有嘢呀嘛大佬，你唔係點啫，無事啦，無事無事，唔好嬲唔好嬲（索一索鼻水）