首演舞台劇做莎士比亞 陳志雲自爆同王喜關係親密
發佈時間：00:00 2016-09-09
57歲嘅陳志雲（Stephen）由幕後管理層到飯局主持人再擔任電台節目主持，今次志雲大師再下一城，將於10月27日至11月1日假北角新光戲院主演舞台劇《莎士對比亞》，劇中志雲飾演莎士比亞，影后葉童演他的情人。自稱與莎士比亞同樣有性取向謎團的陳志雲接受訪問時，坦率地剖白跟王喜之間的一段「兄弟情」。
瓣瓣都撈得掂的志雲大師處男下海，舞台劇《莎士對比亞》擔正男主角，由於劇情要穿越時空，仲要加入舞蹈，所以已密鑼緊鼓進行排練：「導演執得好仔細，即使同葉童嘅親嘴位都設計得好靚，好有顛覆性。其中有兩段英語對白係要跟足原著，以保留精髓所在，演繹方面係會有壓力，因為觀眾應該對莎士比亞有認識。」志雲大師好欣賞兼了解莎士比亞劇作、詩歌同金句，當中有好多人生哲理能用諸現今世代，好似「破冰」、「愛情係盲目的」、「發閃光的不全是黃金」等，大師秒速抽水：「好似依家咁，就算拎到博士學位都唔代表一切，可能連嗰所學校喺邊都唔知道，係咪利用博士銜頭先至可以勝任更高崗位呢？」大師仲大讚莎士比亞好有自學才華，對時下年輕人尋找出路係一個借鏡。
藝人做自己先長久
他又引述莎士比亞名著李爾王（King Lear）（四大悲劇之一）來提醒藝人要著重本質，堅守信念：「演藝界最大矛盾係新入職嘅怕冇人識；識咗又要有空間，面對批評又會唔開心。某程度上我好欣賞欣宜生活態度，唔會為迎合別人扭曲自己，正如曾志偉咁有着個人風格先會長久，根本冇人可以取代到志偉，只可以話似曾志偉。我好耐冇睇崔建邦啦，以前我同佢合作時都有提醒佢做司儀要有自己，而唔係流暢地照稿背。」
王喜成日鬧陳志雲
另外，大師大讚黎耀祥工作態度一流，同莎士比亞一樣即使落難時做幕後代唱依然Enjoy：「以前祥仔就算企喺好多人身後演出，都會好落力，默默去等機會。」說到同王喜之間的「兄弟情」謎團，王喜係咪對他存有仰慕成份呢？陳志雲笑說：「又唔覺喎，因為佢會好惡咁鬧我，屋企人先會咁對我，我同佢係突破朋友界限，係好好兄弟。王喜對朋友好似對屋企人咁，愛恨分明，好到無怨無悔。有時畀佢鬧我會默不作聲，等佢冷靜落嚟先再傾，（咁你有冇鬧佢？）哈！冇，因為佢根本唔會聽我講。」
場地：紅磡都會海逸酒店
採訪：方騫平
