Executive日記——聶德權追小說冷落老婆邱騰華愛做「文青」兩局長書展大談睇書經

專欄

更新時間：04:19 2017-07-22
發佈時間：00:00 2017-07-22

　　政府新班子上任唔夠一個月，司局長已頻頻落區同市民接觸。商務及經濟發展局局長邱騰華（Edward）同政制及內地事務局局長聶德權（Patrick）昨日就去咗書展行番轉，仲同一班年輕人大談睇書經驗，分享自己最鍾意嘅書種，互相交流！
　　M21青協網台在書展期間，舉辦名人同青年逛書展交流活動。繼日前特首林鄭月娥後，昨日就請來Edward同Patrick與青年分享閱讀樂趣。Edward話，佢自小就好鍾意逛書店，到O依家每兩、三個星期「飛完髮」都會去附近間書店行下，仲話自己特別鍾意樓上書局，因為貪佢有種「大隱隱於市」嘅文青、文藝氣息，同O依家充滿茶葉或者香薰味道嘅新式書局，完全唔同咁話！
　　Patrick就話自己最愛推理小說，仲大爆有次試過趁太太出門，佢就由朝到晚都拎住本小說睇，搞到太太吩咐佢做嘅嘢就全部都無做到！但佢話覺得自己睇推理、偵探題材多，慢慢個人會變得「冷酷」，所以O依家都睇吓其他類型嘅書喇！佢又向同場十位年輕人分享咗兩本有關運動嘅書，從中領悟到好多人生道理，呼籲大家都要多睇書、多運動！
Kelly Chu