走出陰霾 做幸福人妻 37歲陳文媛現「龍躉」槽肥等生
發佈時間:00:00 2018-01-25
![幸福肥
企喺丈夫身旁嘅BoBo keep到靚樣,惜身形走樣,手臂、小腿等變粗,下盤驚變「豪華臀」。一身casual look配上珍珠耳環和珍珠戒指作點綴。](https://image.hkhl.hk/f/1024p0/0x0/100/none/5daee166cdc45b472f40b88c45560d76/images/640674wnep078p01a.jpg)
38歲嘅陳文媛(BoBo),08年受前度陳冠希「閃卡事件」所累,原本退出娛圈等嫁金融才俊金紫耀,最終分手收場。好在其後變身「金融之花」嘅BoBo喺教會邂逅真愛—四眼男教友,前年尾二人低調拉埋天窗。有老公勁錫,BoBo走出過往陰霾,開心發福。日前晚上,本報喺尖沙咀發現BoBo與親友喺酒家廂房歎壽宴,離開時,身穿波鞋緊身褲嘅人妻全身圓潤,仲驚現「大龍躉」,唔知BoBo係咪想槽肥Ready生仔,幫圈外老公開枝散葉呢!
「閃卡事件」搞到好多受害女藝人心慌慌失晒蹤,其中近年轉行做咗金融嘅陳文媛亦努力忘記傷痛,有指佢學投資靠自己,被舊愛金紫耀老闆、有細價股股神之稱嘅莊友堅賞識,做咗佢身邊大紅人。揸Benz跑、有層逾約六百萬杏花邨五百呎單位揸手嘅小富婆BoBo 16年尾秘嫁細三年、貌似「高瘦版白只」嘅平凡打工仔,樂做平凡人妻。
有樓揸Benz跑
早前被追訪、強調自己唔係呢個圈嘅BoBo,日前晚上7時許相約家人去尖沙咀百樂門宴會廳同嫲嫲食壽宴。化淡妝嘅人妻keep住多年嚟招牌短髮,皮膚白滑仲好省鏡。不過身材就大走樣,唔知係咪因為四眼老公錫到燶谷肥愛妻,以前紙板身材嘅BoBo明顯脹咗,手腳厚肉,連個hip都變咗「豪華臀」囉!見BoBo一家人有老有嫩,訂咗間房食6千7百蚊最貴嘅百囍宴套餐,有龍蝦、大排翅、原隻鮑魚和大星斑等,食得幾豪!逗留至約十時許,孫女BoBo畀錢找數,其夫先行拎嘢落樓,未幾BoBo等人陸續步出,一家人傾多幾句就四散。記者上前採訪,人妻初時笑笑口友善回答:「同嫲嫲食生日飯呀!」再問佢舊愛Edison已為人父,有無恭喜對方及聯絡?BoBo一直詐聽唔到,細心扶嫲嫲上車,再開車走人。
採訪 : 李維隆、李權威