錢小豪自辯偷拍裙底屬誤會

星島日報-娛樂

更新時間：10:44 2016-07-18
發佈時間：02:51 2000-07-14

(記者嘉莉報道)錢小豪日前涉嫌在超級市場內偷拍女顧客裙底春光後﹐傳媒與他失去聯絡。昨日中午十二時﹐小豪主動相約記者在他投資的Deep Blue酒吧內開記者招待會。

錢小豪在兩名律師、導演張之亮與女友丘倩鳴陪同下準時出現﹐他甫下車見到記者就問﹕「啲人到齊未﹖」記者謂已到齊﹐他說﹕「乜咁準時﹗」

　　在場有三、四十個記者連港、台電子傳媒﹐當記者爭相拍照﹐引起混亂時﹐小豪就大聲叫傳媒小心。記者招待會在Bar內一個卡拉OK房開始﹐小豪女友邱倩鳴則在外面等候﹐沒有進內。

　　率先開口的是張之亮﹐他說﹕「七月十一日﹐小豪去粉嶺超市買嘢﹐這件事純粹係一場誤會﹐估唔到會被渲染﹐小豪覺得好遺憾﹐受咗好多壓力﹐佢知道有好多朋友為佢擔心﹐為咗唔想再有咁多揣測﹐所以咪召開記者招待會。這兩日﹐小豪唔係蓄意避傳媒。」

　　接着﹐是錢小豪的自白﹕「當日我飲咗好多酒﹐估唔到這件事出咗嚟引起咁大誤解同誤會﹐過程我唔方便講﹐因為已經交咗畀警方處理調查緊﹐我好多謝咁多人關心我﹐亦知女友受咗好多壓力﹐我好遺憾﹐希望大家唔好再揣測。」說到這裏﹐男兒漢的他也眼泛淚光。

　　他知道恩師張徹也擔心他﹐所以藉此機會對恩師張徹說﹕「無這件事發生﹐你可以安心﹐唔使擔心。」

　　究竟警方有無檢控小豪呢﹖他說﹕「問我律師。」坐在其身邊的律師即接着說﹕「未Charge。」張之亮也搭嘴說﹕「係好細嘅誤會﹐發生咗藝人身上先變成大件事。這半年﹐小豪為咗做導演﹐度劇本而絞盡腦汁﹐今次這件事對佢係一個沉重嘅打擊﹐好彩無影響佢嘅鬥心。了解小豪嘅人都
知佢係一個乜嘢人﹐一直熱心社會公益。」

　　問小豪是否最近學玩Vidio Can﹖張之亮又代答﹐說﹕「導演係需要用鏡頭去講說話﹐一個普通人都拍嘢㗎啦。」究竟有無攞攝錄機入超市﹖小豪望一望律師﹐律師說﹕「警方調查緊﹐唔方便講。」

　　事發後﹐最擔心甚麼﹖小豪說﹕「朋友﹐尤其係女友﹐返工放工都有記者等﹐對佢日常嘅生活有影響。我知佢受咗好多壓力﹐所以憔悴啲﹐唔開心。」

　　女友是否信任你﹖他說﹕「佢了解我嘅為人。(事發後﹐有無用懷疑口吻問你﹖)整件事係點我都講晒俾佢聽﹐佢仲叫我以後有乜壓力﹐都唔好飲咁多酒﹐新聞出咗嚟對我唔好﹐我會聽話啲㗎啦。」

　　小豪透露﹐送完女友返工才去超市﹐因為與女友有拗撬﹐心情欠佳才飲大了。他說﹕「生活有壓力﹐有乜壓力就唔方便講出嚟。」

　　那前晚點過﹖小豪有點愕然﹐說﹕「正常去瞓覺囉。(瞓得着﹖)瞓到﹐又無做乜﹐做平常人嘅生活﹐食飯、瞓覺、諗嘢、諗劇本。」

　　整個訪問僅短短十五分鐘﹐期間多次發現小豪眼泛淚光﹐聲音亦有點顫震。臨走時他再補充一句﹐說﹕「麻煩晒各位。」　　