梁思浩小家唔肯合照

星島日報-娛樂

更新時間：19:08 2016-07-18
發佈時間：02:11 2001-02-28

（星島日報報道）曾揚言「經一事長一智」的梁思浩，真係講就天下無敵，做就無能為力，事關他首晚復出參予EYT演出時，記者要求他與有份演出的容祖兒影合照，女方亦落落大方表示「冇所謂」，而男方就顯得扭扭擰擰，口頭上話肯，最終就借汪阿姐過橋拖延時間，完騷後更一支箭衝入貴賓房（平日是供藝員洗頭的房間）避開傳媒，直至容祖兒走後，他才由房間步出，如此舉動實在難明？

　　被EYT監製林嘉穎刻意安排容、梁兩人碰頭，容祖兒表示唔知情亦冇所謂「只按照公司安排工作，有新歌當然要宣傳，撗掂都排咗舞。（見到思浩會否尷尬？）其實我同佢都冇嘢，大家都係做嘢啫，（如果同思浩影合照呢？）影相冇乜所謂！」

　　在錄影廠，容、梁其實並沒有同場的演出，思浩扮演陳冠希做短劇，祖兒就只唱壓軸歌曲，不過正當祖兒出場時，剛巧就與思浩有九秒九的正面接觸，不過思浩就刻意與容祖兒擦身而過，兩人完全沒有眼神接觸，當記者們要求兩人合照時，容曾經一度企定定等影合照，思浩口頭上亦答應記者要求，而到臨門一腳他就有心拖延時間，走到汪阿姐身邊詢問是否要補拍宣傳短片？阿姐隨即點頭，他就留在錄影廠與一眾演員錄影，祖兒惟有識趣離開。

　　梁思浩用完拖字訣耍記者後，又再使出一招「鴕鳥政策」，由錄影廠飛入貴賓房，擺明唔想與容祖兒有任何接觸，身為他好友的洪天明、馬小靈、黃泆潼等人，更先後為他把風，各人不斷出入房間，狀似看清楚容祖兒是否已離開化妝間！

　　「巧合地」容祖兒離開不到十分鐘，思浩由好友陪同下步出房間，至於為何表現如此「小家」，他解釋：「之前都影咗合照，（有冇同祖兒打招呼？）有，我哋有打招呼，（但現場所見兩人是絕無眼神接觸！）」至於點解躲入房避人？思浩就話因為自己冇嘢想講，加上和同事有嘢傾喎！口爽爽的思浩，在離開前，更許下諾言，話日後大家會經常見面，下次一定影！