頭條戲場 - 《創戰紀：戰神降臨》麻煩友演麻煩友 | 頭條戲場
發佈時間：02:00 2025-04-11 HKT
系列的第3齣電影《創戰紀：戰神降臨》（暫譯，TRON：Ares），謝勒力圖飾演AI程式「戰神」，跟《電子世界爭霸戰》（1982年）、《創戰紀》（2010年）最大分別是︰「戰神」帶着邪惡意圖衝出數位網格（digital landscape）殺入人類現實世界搞破壞，是40多年來的第一次。 撰文︰華朗
該片由《黑魔后2》導演喬奇姆羅寧（Joachim Rønning）執導︰「我哋唔想陳腔濫調，『戰神』（Ares）有啲似皮諾丘（《木偶奇遇記》，Pinocchio），佢想成為一個真正嘅男人。由代碼變成血肉之軀，『戰神』反客為主，對世界有獨特睇法。寫劇本時，我哋傾過佢仲係嬰兒嗰陣，第一次探索世界有啲乜嘢感受，又例如嗰啲我哋認為理所當然嘅事已經唔再存在，觀眾透過『戰神』對眼睇世界——呢套戲嘅主題係講成為『人』需要啲乜嘢。」在兒童文學《木偶奇遇記》中，故事發展是場悲劇，皮諾丘是個「壞咗嘅人」，鍾意撒謊，一講大話鼻子就會變長；原著作者Carlo Lorenzini形容皮諾丘為「飯桶」、「惡魔」、「流氓」、「褻瀆者」與「邋遢小孩」。皮諾丘剛被打造出來時，就取笑父親樣衰兼戴假髮。
謝勒力圖（Jared Leto）是荷里活「麻煩友」，當年憑《續命梟雄》演男變女跨性別者／愛滋病患者，大受好評，勇奪金球獎、美國演員工會獎和奧斯卡「最佳男配角」，之後迎來「超級英雄電影疲勞期」，同時遇上華納內亂，他拍《自殺特攻：超能暴隊》演小丑，最後剪剩10分鐘戲份，雷聲大雨點小；有傳他不滿被取代，得知Todd Philips拍《JOKER小丑》搵咗Joaquin Phoenix而向華納施壓。謝勒力圖擔正Sony的超級英雄片《魔比煞》，演吸血鬼更是災難，最爆是去年話要去俄羅斯舉行音樂會。迪士尼《創戰紀：戰神降臨》搵麻煩友演麻煩友，有《黑魔后2》在前，視覺效果有保證，又有75歲謝夫布烈治（Jeff Bridges）回歸，加埋搖滾班霸Nine Inch Nails創作配樂，睇牌面OK。
頭條戲場
