KellyChu - The Henderson李兆基展四篇章瀏覽四叔傳奇一生 | Executive日記

專欄

更新時間：02:00 2025-04-23 HKT
發佈時間：02:00 2025-04-23 HKT

恒基地產將舉辦《李兆基博士紀念展——和光同塵》，讓公眾透過展覽緬懷四叔傳奇一生。展覽定於5月1日至5日喺中環超甲級商業項目The Henderson頂層嘅Cloud 39宴會廳舉行，分為「志存高遠」、「開基創業」、「福澤延綿」及「潤物無聲」四大篇章，並首度公開四叔生前珍貴藏品和照片，同時設紀念花園供公眾留言致敬。

首公開生前珍貴藏品

　　四叔上個月17日離世，作為香港商界傳奇人物，其生平受到大眾關注，是次紀念展正好讓大家更加了解佢嘅輝煌人生。

　　展覽第一章「志存高遠」將回顧四叔創業歷程，展出其珍貴私人物品，例如從順德家鄉金舖隨行而來嘅金秤，以及佢日常隨身攜帶嘅懷錶等，見證四叔從金行學徒到地產巨擘嘅非凡之路。

　　第二章「開基創業」聚焦四叔嘅管理哲學，重現其辦公室場景及展出恒基地產早期嘅周年紀念刊物。第三章「福澤延綿」則透過家族照片與生活點滴，呈現四叔作為慈父與慈祥祖父嘅溫暖一面。最後第四章「潤物無聲」展示四叔自1980年代起所做嘅慈善善舉。

　　恒基地產表示，四叔紀念展免費開放公眾參觀，每場參觀時段為半個鐘，現已接受網上預約，需留意每組登記最多4人，名額先到先得。

　　The Henderson旁邊嘅藝術花園，亦添置咗英國藝術家Jenny Pickford創作嘅大型繡球蔥花形態雕塑藝術裝置《Allium》，象徵生命嘅堅韌與不屈精神，不但為是次展覽增添藝術氣息，更將成為公眾緬懷四叔嘅永恆地標。

KellyChu

↓立即下載星島頭條App↓