鄭裕玲：要搵有信譽專業醫生

星島日報-娛樂

更新時間：17:18 2016-07-26
發佈時間：01:23 2005-06-08

(星島日報報道)愛美是女人的天性，日前有少女不惜隆胸結果爆胸收場，聰穎的鄭裕玲姐先叮囑大家，外表不過是其中一部分，但內涵同樣重要﹗女士們就算要求助整形醫生，也要找個專業和信譽兼備的。

　　鄭裕玲(Do Do)姐昨日與關錦鵬導演接受王喜主持的「Roadshow」訪問。談到昨日報章大字標題少女隆胸失敗爆胸事件，一向很留意時事的Do Do姐也有看過報道，但奇怪何以有相片刊登﹔那麼Do Do姐認為隆胸是否值得﹖她說﹕「有啲真係靚㗎，好似某位Model咁，但真係要搵個有信譽的專業醫生，但呢啲嘢無話十全十美，整得就會有風險，唔知事件有無得賠償呢﹖如果仲有主持《百法百眾》，真係要在節目中問下先。(是否贊成隆胸﹖)我覺得外表只係其中一部分，但做人要有內涵，一開口成個鄉下妹、甚麼也不識也沒有用，最好是兩樣都有齊。」

　　另外，提到米高積遜侵犯兒童的案件，Do Do姐亦大表關注，反問判了案沒有﹖因她曾主持《百法百眾》，明白律師可以執着兩個字便打好耐官司。Do Do姐說﹕「如果真係判佢有罪就大鑊喇，佢咪要戴好多嘢入獄，又要戴假髮、又要戴白色粉底等等，其實以前我很欣賞他的，但現在已不再鍾意了，他像科學怪人，很肉酸。」

　　蔡少芬(Ada)昨日拍攝新劇《火舞黃沙》期間接受記者訪問，對於少女因男友嫌棄而隆胸引至爆胸，Ada感到極之驚訝，她說﹕「每個人要對自己嘅決定負責，我覺得做呢啲手術有一定危險性同後遺症，我唔可以喺度話呢件事係啱或者係錯，不過我個人認為自然美最好啦」。

　　對當事人指被前男友嫌棄才往整形，Ada說﹕「啲男人低能嘅，咩叫愛呀﹖愛情唔只得樣貌同身形，咁樣諗好傻，就算超模身形都會變啦。女仔應該要知道自己嘅吸引力去到邊，而呢啲咁嘅男仔更加要打醒佢啦」。

　　昨日湯盈盈出席夏日美髮美甲潮流示範巡禮。對少女隆胸失敗而爆胸一事，湯盈盈聽後甚為緊張。她覺得隆胸的人好大膽，她自己一定不敢做。她謂每次減肥上圍都會縮水，不過她認為大胸着衫不一定靚。她說﹕「現在有Push-up Bra，細胸仲多變化。我不建議年紀細去隆胸，發育還未完成。」她覺得爆胸自己都要負責任，一個人應該滿意自己的身形。上圍太豐滿可能給人好蠢的感覺，別人的眼光亦會集中在自己的胸部。

　　提到米高積遜的案件，她謂已經有幾個個案，她都好懷疑米高，可能對方之前以為錢可以掩蓋一切。她覺得有關小朋友的案件不會輕判，因為事件會影響小朋友的將來和思想。