醉擒後首見面抑鬱Cammi突擊對質萬寧哥哥發瘋狂飆
發佈時間：00:00 2011-09-22
月前，先後被踢爆嗒盡港台索女的萬寧哥哥（沈志明）終於嗒出禍來，被年僅16歲的o靚模組合Fantasy成員Cammi（謝芷蕙）大爆其借醉狼擒惡行，可憐事件曝光後，原告慘變被告，女方唔報警卻選擇同傳媒自爆而被千夫所指，披着羊皮的狼卻反獲支持。事件發生後，一直瞓唔安食唔落的Cammi疑患抑鬱要向精神科醫生求助，眼淚流不止的她說：「我只想討回公道同一句道歉。」本周二晚，剛於旺角完成電影謝票活動的沈志明發現Cammi即黑面轉身再驚青疾走，「敢做唔敢認。」被當透明的Cammi咬牙切齒地說。
採訪：方騫平、陳辰、畢紹基
因為一個陽光笑臉，令來自台灣的「萬寧哥哥」在港一炮而紅，年半不到連拍三部戲，影壇新貴非他莫屬，不過，被港女大讚如鄰家男孩般靚仔又可愛的沈志明其實非常雜食，恃住靚仔喪溝女，原來他才是真正的「少年食神」。險成「少年食神」晚宴的Cammi，雖然大膽說出真相卻反被判死刑，因而寢食難安，更怕被人注視，總之一有人望就認定對方恥笑佢，其經理人Edmond覺得事態嚴重，即急急帶Cammi往中環的萬邦行睇精神科醫生。
Cammi睇精神科
「我一諗起嗰件事就好驚，晚晚發噩夢，成日俾同學笑，搞到我唔敢喺Canteen食嘢，屋企人又不斷哦我，要我解釋，就算放學番屋企途經M記，都會俾啲企喺門口嘅女仔指住鬧，仲叫我咪走。」一口氣說畢積藏已久的屈辱後，Cammi的淚水便如爆水喉般失控，「朋友話我無腦白癡，點解跟人返屋企，我好後悔。」問到事件曝光後，男方有否向她道歉，Cammi不斷狂擰頭，「無，佢只係用無來電顯示嘅電話打畀我，同我講唔應該公開件事，仲問我係咪對我好差，但就一句Sorry都無，我只想討回公道，還自己一個清白。」
沈志明驚青
本周二晚，沈志明剛巧於旺角出席電影的謝票活動，記者趁完結時上前拍拍男方膊頭，「少年食神」回頭一笑並說：「係咪想要簽名呀?」但眼利的他發現瑟縮在記者身後的Cammi即極速變臉，然後轉身急步走，其間男方的女助手還出手推記者：「你想點呀？」在混亂間，沈志明已上了Crew車，並直駛往上環信德中心，落車後，沈志明借錢國偉（Wilson）做擋箭牌，菩薩心腸的肥Wil就一直伴着沈志明至上的士，「你會唔會同Cammi道歉呀？你係咪男人嚟㗎？咁樣蝦一個女仔。」但當晚男方視覺及聽覺明顯有「毛病」，對記者一切提問皆充耳不聞，亦對苦主Cammi視若無睹，對於被人視作空氣，Cammi坦言見番沈志明好驚又好嬲「敢做唔敢認，祝福佢陽痿。」而一直剝住花生睇戲的Wilson笑笑口說：「佢（沈志明）喺車上同我講，話只係帶個女仔去佢屋企睇吓啲裝修同煮下飯喎。」而Cammi聽畢Wilson的說話終於笑了，「吓！佢住北角劏房咋喎，邊有裝修呀？又無廚房點煮飯啫。」
