倉田保昭來港開武館與元彪論盡武打明星

頭條日報-娛樂

更新時間：02:49 2015-06-19
發佈時間：00:00 2011-10-14

       曾在上世紀七十年代拍過多套港產武打片，與陳觀泰及梁小龍等武打明星有對手戲的著名日本動作片演員倉田保昭寶刀未老，除了有意和內地合拍動作電影外，更睇準香港市場對功夫的熱誠，打算來港開空手道館。日前倉田保昭跟多年好友元彪飯局，詳談未來合作大計，兩老友相聚，放開懷抱，言笑晏晏，元彪更語出驚人說：「依家冇一個動作演員好得，動作演員冇靚仔，靚仔統統去唱歌同埋拍文藝電影啦。」採訪：方騫平
      過去倉田保昭跟元彪多次結片緣，先後合作過《富貴列車》、《夏日福星》、《東方禿鷹》等多套賣座電影，老友鬼鬼，倉田保昭有意來港於銅鑼灣區開設空手道館，自然相約香港地膽元彪探路。
      是晚兩人相約歎上海菜，同場還有出任經理人的倉田保昭囡囡Nana Kurata。倉田獲空手道糸東流五段、柔道三段、合氣道二段，開空手道館自然取得優勢，加上囡囡長居香港，能協助打理生意，可配合天時、地利、人和。倉田不排除做生招牌，親自出任導師，並邀元彪做客席教練。
      元彪品評後輩
      當晚倉田保昭和元彪閒話家常，話題總離不開武術，提到時下動作演員青黃不接，元彪坦承：「我夠膽講，依家冇人（動作演員）跟到，可能某些人大家認為佢好得，係宇宙最威，但我會用另一種角度去睇，唔係出名就好得，因為拍動作戲要有態度，要畀人睇到點去投入，絕對唔係去吹噓，在記者前一套，記者後一套，仲唔可以搵替身，呢啲我哋識睇㗎嘛。」
      元彪眼中，新一輩動作演員中謝霆鋒和杜宇航都算OK，至少杜宇航對功夫有認識。