萬寧兩便衣保安誤當顧客盜竊箍頸扯背囊拖行50米女事主驚恐萬寧致歉解僱兩人

突發

更新時間：17:39 2024-10-09
發佈時間：17:39 2024-10-09

一名禪柔及普拉提運動女導師昨日（10月8日）早上在尖沙咀一間萬寧內以自助付款方式購物，當離開店舖大約數秒後，突然被兩名陌生女子箍頸兼扯背囊，聲稱她涉嫌盜竊，要將她帶返店內查問。事主一臉茫然只好出示收據以示清白，其後店舖經理指該兩名女子為「便衣保安」，令她非常吃驚，「我真係以為自己係俾人綁架，同埋當兩個女人同時扯走我嘅時候，我一個人係冇辦法掙扎到」。

萬寧回覆查詢時表示，管理層已親身向姓梁事主致以慰問及道歉，並承諾跟進事件。萬寧又提到，涉事的兩名便衣保安員經第三方保安公司聘用，兩人已被即日解僱，萬寧亦已決定終止與該保安公司的合約。

女事主：我真係以為自己係俾人綁架

女事主昨日於社交平台threads發文並上載一張購物收據，指她自己早上10時左右於尖沙咀金馬倫道的一間萬寧內購買兩支川貝枇杷膏，當時店內只有3名顧客，她在自助付款機用八達通付費後便離開，詎料突然有兩名女子突然上前箍頸及扯背囊，「（佢哋）好大聲咁話：你跟我過嚟！你冇畀錢！你偷嘢！佢哋兩個係咁扯住我行」。

事主憶述當時非常害怕，不斷大叫救命，並反問對方是否認錯人，但對方不予理會，並將她拉入店舖內，「個經理仲一臉茫然問我發生咩事？我呢一刻已經驚到喊。好彩我個褲袋袋住張收據，我就同個經理講，我話：點解你會覺得我偷嘢？你覺得我冇俾錢，你咪問我攞張收據睇囉，唔使扯住我入返舖頭啩。」

當時店舖經理指該兩名女子為「便衣保安」，但事主認為兩名沒有身穿制服，沒有掛上職員的女子，當街箍頭扯背囊，不由分說將她拉入店內的行為相當暴力，「最恐怖嘅係呢兩個女人喺呢件事完結之後，其中一個仲無端端搭着我膊頭，同我好似好friend咁話，唔好意思啊，誤會咗你。我立即喝住佢：你唔好掂我」。

事主事後仍有餘悸，聲稱出現手震及心跳過快，更曾擔心到流淚，「我喺香港土生土長我未試過發生咁嘅事喺我身上。我打去客服，佢未俾回覆我。我真係以為自己係俾人綁架，同埋當兩個女人同時扯走我嘅時候，我一個人係冇辦法掙扎到」。

事件引來多名網民熱烈討論，有人認為該兩名「便衣保安」使用過份武力，即使懷疑顧客盜竊亦無權箍頸拖行，要求涉事連鎖店跟進事件，「就算有懷疑，應禮貌邀請入店查問」、「保安係冇任何公權力對嫌疑人物郁手郁腳」、「咁俾人箍頸真係好驚，以為綁架，佢哋太過份」、「真係以為呢度無法無天」。