頭條戲場 - 《五月的你 十二月的她》沒有鬼的恐怖片｜頭條戲場
兩大奧斯卡影后Julianne Moore及Natalie Portman高手過招，演技精彩絕倫。一個控制欲超強的女人Gracie，因為自私而摧毀兩個家庭，另一個明星仔Elizabeth自以為好醒，覺得好易睇穿Gracie再加以模仿，最後輸晒。全片大玩心理戰，人性可怕之極致，冇鬼但好恐怖。因為宣傳唔多，電影在港上映兩個多星期只剩返好少場次，真心可惜。（上映中）
撰文：廖思慧
英文片名《May December》是英文slang，指年齡相距超大的戀愛，即電影的核心家庭，Gracie（Julianne Moore飾）及Joe（Charles Melton飾）夫婦，兩人相差23年。有夫之婦戀上男方時，後者才13歲，是其大仔的同學，兩人發生關係後，Gracie入獄並在獄中誕女，之後兩人排除萬難結婚，20年後，誕下3個兒女的忘年夫婦，在郊區過住好似好幸福的家庭生活。
影后鬥戲勁精彩
忘年夫婦的瘋狂事跡當年被廣泛報道，相隔多年，兩人的不倫戀將被拍成電影，為讓女主角Elizabeth（Natalie Portman飾）深入揣摩角色，安排她以旁觀者姿態融入Gracie和Joe的日常生活作觀察，其實諗唔明夫婦點解會應承，何必再自揭瘡疤？Elizabeth帶住唔認同的心態作出窺探，因為第三者的闖入，打破了夫婦營造的幸福婚姻假象。導演Todd Haynes好高招，藉第三者拍戲為名，逐層撕開忘年夫婦的虛假面具。
3人均在自欺欺人，Gracie強調家庭充滿愛，其實只係用意識操控家人，又情緒勒索另一半，所謂幸福只係自己呃自己；嫩口老公Joe最可憐，青春期都未過就要做人爸爸，以為自己大個仔，其實靈魂永遠被困13歲；至於明星仔以為Follow Gracie衣着同化妝就會變成對方，又自欺洞悉一切。不倫電影開鏡，睇住Natalie Portman努力扮演平庸演員，超渣戲中戲睇到會心微笑。劇本超勁，好鍾意導演的講故事方式，以肥皂劇包裝禁忌倫理題材，越睇越心寒。Julianne Moore演恐怖天真女人手到拿來，令人不寒而慄。
