頭條戲場 - 《墮下的對證》 結婚誓詞真係廢話｜頭條戲場
《墮下的對證》 繼獲得康城金棕櫚獎後，再奪金球獎最佳劇本及最佳外語片，劇本鋪排超勁，層層遞進，你以為懸疑片，其實是一套剖析婚姻的倫理片，實至名歸。因為老公墮樓，老婆成最大嫌疑人，後者需要在法庭提出證據證明自己清白，死老公都冇時間療傷就要將私密家事放上法庭作審判。一場死亡牽引出呢兩公婆爛溶溶的婚姻關係，互相傷害去到完全返唔到轉頭，最慘11歲視障兒子是唯一目擊證人，聽審後得知父母關係如仇人，母子感情亦被破壞，睇到心寒。
（上映中） 撰文：廖思慧
一開場的超大音樂聲已令人非常不安，然後命案發生。死者是法籍作家Samuel（Samuel Theis飾），他跟亦是作家，但較他受歡迎萬倍的德籍老婆Sandra（Sandra Hüller飾）、11歲兒子 Daniel（Milo Machado Graner飾）及愛犬Snoop（Messi飾）隱居法國阿爾卑斯山區的偏遠小鎮。一家三口原本定居倫敦，因為經濟問題搬到好遠，女主外，男主內，男主人鬱鬱不得志，女主人越飛越高，埋下可摧毀家庭的炸彈。
比離婚更慘的事
電影絕非老婆被控殺夫，最終沉冤得雪式老土故事，片長150分鐘，結局都冇交代究竟Samuel是自殺定被殺，因為已經唔重要，法籍女導演Justine Triet只想創作一部「描繪一對夫婦關係崩壞的電影」，恭喜導演，因為佢成功透過一單墮樓案去審視戲中夫婦已支離破碎的婚姻關係，案件的人證物證拼湊出夫婦的病態相處方式及永遠無法解決的難題，因為Sandra表現冷靜，一直對佢心存懷疑，至兩公婆鬧交錄音被公開，沒有婚姻經得起抽絲剝繭，成件事尷尬到不得了，結婚誓詞真係廢話嚟。
劇本超勁，最記得戲中一句對白，Sandra的罪名就是在她老公失敗的領域中獲得成功。 完全是教學級敘事教材，究竟一段婚姻收埋幾多隱瞞、傷痛同嫉妒？連場法庭戲篤爆婚姻最真實的陰暗面，那段史上最到肉的夫婦鬧交戲絕對是未婚人士的震撼教育，毛骨悚然又唏噓，一套非常殘忍的電影。
