頭條戲場 - 《犯罪都市：鐵拳清算》 多謝馬東石賜我提神妙品 | 頭條戲場
頭條戲場
2024-05-03 02:00
字體大小
韓國最強大叔馬東石靠《犯罪都市：鐵拳清算》殺入柏林影展「特別展映」單元，《犯罪》系列拍到第4集，導演由動作指導升格為導演的許明行擔任，電影同時成為2024年開畫票房及《犯罪》系列開畫票房No.1。海外影評大讚好刺激，其實睇開馬大叔作品都知佢玩開邊瓣，今集主題是海外線上賭場詐騙，除咗每集必有邪惡奸角，今次加入網絡調查小隊，內有近期勁受歡迎的李主儐，即《淚之女王》金智媛飾演的洪海仁弟婦。電影好過第3集，但唔及第2集精彩，首集是神，不能比較。（剛上映） 撰文：廖思慧
因為韓國IT𡃁仔客死異鄉，𡃁仔阿媽求「怪物刑警」馬錫道（馬東石飾）查出真相，菩薩心腸的馬大叔即展開調查，越查越唔對路，因為牽涉高科技網絡詐騙，連VPN都唔知係咩，馬大叔即求救，好彩獲網路調查組幫助，從而發現IT仔之死跟韓國最大非法網絡賭博組織有關。
冇半秒冷場
查案過程中，得知非法組織Big Boss是虛擬幣業界的CEO兼IT天才張東哲（李東輝飾），角色設定好巴閉但又唔覺佢IT方面有幾天才，睇到尾都只覺佢係一個唔講口齒，格又衰的有錢佬。被待薄的菲律賓夥伴，非法線上賭場的菲律賓接頭人，特種部隊出身，窮兇極惡的白昌基（金武烈飾）即飛韓國做嘢，然後當然係同馬大叔連場激戰。
馬大叔繼續拳拳到肉，聲效依然恐怖，斷頸式重拳出擊聽到心寒，睇佢出拳就係爽。最欣賞馬大叔做埋老闆都唔貪心，無話搞到自己刀槍不入，只盡量發揮自己優點，聰明仔。另外，今集絕對是系列中最好笑，小學雞黑社會相當歡樂。
頭條戲場
佢就係白昌基，幾靚仔又大隻，全程冇笑過，殺人快狠準。
網絡調查小隊幫手調查網絡詐騙。
在《淚之女王》中飾演「千多慧」的李主儐，戲中是網絡搜查隊主任。
鍾意着到成身GUCCI的張夷帥（朴智煥飾）回歸，是本片的笑位擔當。
IT天才張東哲，個格好衰，超冇口齒。
白昌基擅用匕首，一嘢就可以搞掂敵人，好厲害。
馬大叔為查詐騙組織用盡方法，逼供唔少得。
更多文章
