頭條戲場 - 神奇電影《落葉》 苦中一點甜 | 頭條戲場
頭條戲場
2024-05-03 02:00 HKT
字體大小
電影榮獲康城影展評審團獎及國際影評人聯盟獎，是芬蘭怪傑電影大師Aki Kaurismaki「無產階級三部曲」的續篇。故事屬坎坷都市人愛情片，男女主角均做散工、輪住失業、再做散工、偶遇、一見鍾情、失去聯絡、再遇見、分開、最後互相獲得心靈慰藉。全片瀰漫淡淡的悲傷情緒，但對白又充滿幽默感，呢種苦中一點甜好鬼正，最爽就係片長只係81分鐘，睇得好舒服。（上映中） 撰文：廖思慧
電影大師Aki Kaurismaki是當代最著名的芬蘭導演，先後於2002年憑《扑頭前失魂後》獲得康城影展評審團大獎；2017年憑《希望在彼方》獲得柏林影展最佳導演銀熊獎。導演馳名玩幽默加冷峻style，擅長講故事一嘢中，最過癮拍攝風格，明明身處現今世代，但拍到好似90年代，如《落葉》感覺就非常懷舊，主角依然使用不能上網的摺疊按鍵式手機、到歌舞廳唱卡拉OK、甚至要到cafe租用電腦去搵工等，若非收音機播放俄烏戰事新聞，以為睇緊20年前的電影。
失業又有咩好驚呀
電影貫徹導演唔多言風格，精緻美術加品味一流的配樂，配上簡單故事，成就一套寂寞工人階級的幽默純愛電影。黑仔女工Ansa（Alma Poysti飾）及黑仔男工Holappa（Jussi Vatanen飾）相識於卡拉OK，女工好窮只能食過期食物，收到電費單會擔心得立即拔掉所有電器插頭，雖然窮但見到可憐流浪狗會於心不忍。男工更窮，冇親人冇屋企，寄居地盤員工休息室，雖然窮但依然煙不離口，更因為抑鬱而酗酒，然後越飲越鬱，但兩人無放棄追尋幸福，就係因為世界好亂，更加要大膽去愛。
電影由頭到尾都好得意，所有演員都一臉厭世，連去探病都非常黑色幽默。世界上實在有太多荒謬的事，可以睇一套令你keep住微笑的電影，真好。
頭條戲場
女工鍾意睇戲，男工都鍾意，所以約會地點就喺戲院。
聽收音機唔使錢，但女工唔鍾意聽到俄烏戰事，一聽即熄機。
兩人情投意合，但表現好含蓄，散場握握手下次再見。
男工的同事，好鍾意唱歌，好介意人哋評佢歌藝，好好笑。
男工同事睇中女工同事，好想知對方覺得佢唱歌唱成點。
女工對世界無感，懶理老細做壞事，但見到狗狗會笑。
男工遇到交通意外，女工往探病，仲為昏迷的男方朗讀新聞。
更多文章
