頭條戲場 - 《眼淚工匠》「中二病」校園甜故 | 頭條戲場
頭條戲場
2024-05-25 02:00 HKT
字體大小
好鍾意睇青春校園類愛情劇集及電影，貪唔使用腦，日韓台系就浪漫啲甜啲怕醜啲，歐美系就狂野啲，有大量kiss同愛情動作場面，最緊要主角配角都靚仔靚女，呢期成腦都係何伯同佢真愛個樣，就更需要睇啲靚嘢去沖淡。來自意大利的青少年奇幻痛苦愛情電影《眼淚工匠》，賣點係女一好靚男一好大隻，男女同學仔又好出色，雖然劇情非常老土，超級中二病，但男女主角一接觸就性張力澎湃，令人「肉」罷不能，坐定定睇到尾。（已上架） 劇照提供：NETFLIX 撰文：廖思慧
故事改編同名小說，睇電影海報及劇情簡介，一直以為故事類似《吸血新世紀》，玩奇幻或前世今生或動物化身做人報恩之類，哈，原來係青春校園愛情片。男女主角都在孤兒院長大，深信傳說中，世界上有令生不如死的人找回正常情感的「眼淚工匠」，然後未見過父母的男主角Rigel（Simone Baldasseroni飾），跟父母車禍離世變孤兒的女主角Nica。唔知點解，皆認定對方是自己的「眼淚工匠」。
只適合一個人睇
其實電影氣氛營造得唔錯，全片陰陰寒寒，雨天多過晴天，就算日頭都色調偏灰，配上男女主角的古怪曖昧關係，你硬係覺得套戲唔係咁簡單。Rigel自細暗戀Nica，但唔可以畀女方知道，長大後兩人一齊被領養，離開孤兒院的男方性暗示更強烈，成功引Nica埋身，但又自稱是童話故事中的狼，唔吉利blah blah blah，口頭禪係「你唔好掂我，你離我遠啲」，當然唔係心嗰句。
好靚又成日着住白色半透睡裙的Nica自覺能拯救Rigel，更為了對方放棄都幾有feel的靚仔男同學，不過男主角仍然唔滿足，兩人不斷互相折磨但又互相吸引，前段幾場好克制的親熱戲好有感覺，導演好識拍，色色得嚟畫面好靚，Rigel舔走Nica面上蛋糕一幕，我翻睇了數次。
頭條戲場
男女主角互撩鏡頭最好睇，可以令你忘記所有講唔通的劇情。
導演拍情慾鏡頭好叻，永遠徘徊踩界邊緣，但又keep到浪漫感。
Caterina Ferioli來自意大利，今年20歲，咪睇佢咁瘦，身材唔錯㗎。
男主角Rigel面青口唇白，又易病，但為護女成日同人打交。
女主第一日返學已經吸引男同學目光。
Nica落住雨拒絕男同學Lionel，條白色裙出晒事。
Nica同學仔一個可愛一個有型，身材亦非常唔錯。
更多文章
