頭條戲場 - 《汪汪夢裡人》 哭成狗的愛情寓言 | 頭條戲場
頭條戲場
2024-06-06 02:00
字體大小
動畫故事背景設定於1980年代的紐約，一隻單身狗因為太寂寞網購了一個高科技的機械人作伴，兩人生活於如《優獸大都會》的世界，一齊去公園散步、聽着《September》跳舞、食雪糕、影貼紙相等等，本來平常不過生活，狗狗因為機械人而重生。入場前以為是可愛系動畫，笑住散場happy ending，估唔到散場後哭成狗，後勁超強，睇完電影好耐，見到劇照都眼濕濕。估唔到被一個機械人治瘉了多年創傷，感受非常深，誠意大推。（6月20日上映） 撰文：廖思慧
電影改編自同名漫畫，榮獲安錫國際動畫電影節最佳影片獎及奧斯卡最佳動畫長片提名。一隻狗加一個機械人，全片冇對白，單靠角色之間的肢體語言及眼神，完美交代人類所有情感，包括孤獨、思念、放手及愛等，甚至讓觀眾融入這段細膩且遺憾的愛情故事。
令人心碎的無字情書
因為一個意外，機械人及狗被逼分開，後者用盡方法也未能將前者帶回家，只能期待在1年後的6月1日相聚。一齊時有幾快樂，分開後就有幾痛苦，因為冇刻意強調角色的性別及年齡，一段最純粹愛情關係，可以是你或我或她。在等待的日子，狗狗已非當日的單身狗，會報名參加旅行團、有段霧水情緣，而機械人亦獨自經歷了3季，感受了好多善意及惡意，但難得地就算幾難捱，機械人也會笑住面對。有人好嬲狗狗冇盡力，但我更嬲所有的無能為力，放手唔代表要你忘記，珍惜目前所有，快樂回憶永存心中。戲中多次出現已不在的紐約雙子塔，導演的心意希望大家都收到。
貫穿全片，狗狗最愛的歌曲《September》感染力極強，寫稿呢刻滿腦都是歌詞，仍然feel到心痛，好黐線。完全被結局重擊，嚴重地殺我一個措手不及，屬超重洋葱愛情寓言，散場後淚流不止。謝謝導演Pablo Berger拍了一部這麼好的作品，願看過動畫的人，都能被好好治瘉。
頭條戲場
單身狗好寂寞，每日食微波食物，夜晚就睇電視。
狗同機械人好似初戀情侶咁，日日去玩去跳舞。
片中多次出現已不在的雙子塔。
因為唔畀自己再寂寞，狗狗識到鴨女，一齊釣魚同放風箏。
狗狗好悶，發夢識到只能冬天先有嘅雪人朋友。
因為意外，狗狗唔可以同機械人返屋企，悲劇開始。
有機械人相伴的狗狗如重生，變得活潑鬼馬，兩隻嘢互動好好睇。
更多文章
