頭條戲場 - 《全職乖孫》各位老人家唔該愛自己多啲 | 頭條戲場
故事發生在一個泰籍華人家庭，一事無成只識打機的明仔（Billkin飾），知道讀醫護的堂妹小梅（Tu飾）因為貼身照顧病重富貴阿爺獲巨額遺產，聽到獨居婆婆（Taew飾）患末期肺癌，即萌生貪念，由點叫都唔肯探吓阿婆，秒執好行李搬去同阿婆住方便照顧，你知我知單眼佬都知，阿婆食鹽多過你食米梗係乜都知。電影屬泰式非煽情類溫情小品，難得講親情但唔算太多夾硬谷你喊橋段，婆孫互動好搞笑，因為個孫好懶，做嘢又hea，叫佢煲水就咁裝碗水放入微波爐叮熱佢，無限激死阿婆，大量過癮吹脹笑位。（剛上映） 撰文：廖思慧
Hea爆明仔因為太hea，不斷激嬲阿婆，更被阿婆踢走，繼承遺產之路波折重重，惟有向堂妹請教，學吓點樣幫老人家按摩，點樣陪去覆診，管接管送，慢慢由激hea變認真，阿婆看在眼裏終於識笑，同時間明仔心態亦有所變化。
又笑又嬲又想喊
因為相處日久，明仔發現繼承之路還要跟兩個舅父競爭，贏面極少，但明仔由緊張變得無所謂，更開始同情及心痛婆婆的孤單，討厭眼中只有老婆及囡囡，每周家庭聚會急急腳走，又呢又路超多藉口的大舅父；超討厭較他更一事無成又周身債兼手腳唔乾淨的細舅父，然後明仔發現媽媽最辛勞，但最得唔到婆婆嘅愛，該死的重男輕女，如果有十大屋企人最乞人憎行為排行榜，兩位舅父的排名絕對是冠亞之爭。
結局會難過，睇戲當晚座位附近有好多開紙巾袋的聲音，但我還好，因為可以好好道別其實係一件好幸福嘅事，希望所有老人家都能愛自己多啲。全片冇任何狗血劇情，情節亦唔算起伏，睇完會諗起已離世的婆婆嫲嫲，心裏祝佢哋安好。睇完戲search演員名單，原來男主角是泰國歌影視男神，首擔任電影男一，為配合角色更努力減去22磅，甚至為獲得角色，試鏡前上了半年演員課程。另外，飾演阿婆的Taew更是第一次拍戲，難以置信。
頭條戲場
