頭條戲場 - 《無聲絕境外傳：首襲日》 世界末日又有咩好驚呀 | 頭條戲場
頭條戲場
2024-07-03 02:00
字體大小
《無聲絕境》及《無聲絕境II》全球票房大收逾6億美元，成為驚慄懸疑電影的新經典。系列去到第3集，跟前2集一家五口完全冇關係，轉為同首集一樣時間線，即外星核突生物入侵地球的第1天，但從另一群在紐約生活的倖存者視角出發。影評一面倒狂插好悶、唔夠驚嚇，其實本身玩「唔想死咪出聲」概念已經唔新鮮，《外傳》玩末日情誼，一個癌末女加讀law的驚青男逆着人潮在大城市廢墟漫步，最重要末日降臨仲可以養貓又可以互相救贖，驚嚇度的確唔夠前兩集多，但非常溫暖。（剛上映） 撰作為資深貓奴，一睇預告已經知道必須要入場，人類完全控制唔到BB同動物叫喊，續集見證過BB喊聲嘅威力，貓叫亦可大可少，估計會吸引大量依靠聲音獵食的外星生物埋身，相信全片緊張位亦同貓有關，入場後發現原來諗多咗，人生第1次睇文藝驚悚片，感受非常特別。
連貓都知道唔可以亂出聲
全片重要人物，孤獨癌末女詩人Samira（Lupita Nyong'o飾）跟一隻貓Frodo住喺靈養院，因為好想食pizza走進市區，撞正外星生物隨隕石跌落地球，好多人死，不斷傳出爆炸聲，人人叫救命，吸音怪物興奮地享受人肉放題，明明打頭陣呢幕就好好睇，玩人體光影灰塵加突然無聲，貓貓仲要被巨響嚇親跳走，稍為代入少少，恐懼感已瀰漫全身。
電影冇一個壞人角色，個個守望相助。最特別驚青男主角Eric（Joseph Quinn飾）中途出場，雖然跟女主角萍水相逢，但末日面前互相支持，齊在暴風雨中大叫，更在黑暗中吟詩，甚至演奏不能發聲的樂器，我覺得好浪漫。Samira本來就要死，人人想逃離市區，但佢選擇逆着人潮返回已變廢墟的出生地，在生命盡頭好好跟自己及世界告別，如果世界已變爛，末日又有咩好驚？
頭條戲場
男主角因為見到Frodo先跟女主角相遇，好彩世界上有貓。
Henri（Djimon Hounsou飾）曾出現《無聲II》，當中講述外星生物入侵時，他在紐約跟市民如何試圖乘船撤離。
紐約市居民聽到有逃生船即刻出晒嚟，怪物全部喺附近。
因為怪物怕水，政府為咗杜絕怪物四散，自私地燒橋。
呢幕地下鐵逃亡超驚險，套戲點會唔恐怖呀？
男主角攬實隻貓狂奔上船，你睇後面隻嘢幾黐線。
全靠女主角好堅強，男主角先有勇氣生存落去。
Samira一身文青打扮在廢墟放貓，反正都要死，冇所謂啦。
最Hit
47歲婦常飲1種湯 腦出血中風亡！長期飲恐致癌？醫生揭4大風險
2024-12-09 13:48
海關總署署長俞建華猝死終年63歲 網傳非正常死亡
10小時前
伍仲衡被炒魷｜選秀節目評審頻惹爭議 肥媽趙增熹躺著中槍 《全民造星》現最hea評判 陳潔靈：評語要到肉
2024-12-10 15:40
更多文章
