頭條戲場 - 《玩轉腦朋友2》教你如何放過自己精讀班 | 頭條戲場
頭條戲場
2024-07-05 02:00
字體大小
2015年推出的《玩轉腦朋友》全球票房癲收8.58億美元，超可愛情緒主角加天馬行空想像力，借5種情緒去講成長，全片多處淚點，冇諗過一個得意動畫會睇到老淚縱橫，自此愛到癲咗。等足9年，《腦朋友2》去到更高層次，戲中女主角韋莉已經13歲，踏入青春期，大腦總部發生翻天覆地巨變，有新情緒專員加入，當中以好神經質的阿焦（焦慮）孭飛，本來被快樂主導的韋莉變成另一個人，不斷質疑自己「我做得唔夠好」，睇到一泡眼淚。（7月11日上映） 撰文：廖思慧
童年韋莉好快樂，因為由「腦朋友」阿樂領軍，帶住阿愁、阿驚、阿燥及阿憎，所有事都好正面，不過，今集有全新「腦朋友」登場，包括乜都擔心的「阿焦」，成日覺得人哋嘅嘢最好的「阿羨」、生無可戀hea到爆，主張躺平的「阿厭」及終日不知所措的大隻仔「阿尷」，貼近人類複雜又細膩的情緒表現。
得閒讚吓自己
青春期是成長必經之路，韋莉準備升中學，暑假跟老友獲邀參加曲棍球營，因為面對崇拜的球隊前輩，好想被選入球隊，加上要同老友進入唔同中學，青春期的警示燈號響起，新情緒大舉進入，阿焦為打造更好的韋莉瘋狂改造佢，希望佢諗到自己唔好嘅地方再努力改進，但反令她不斷自我懷疑，「我做得唔夠好」是全片令我最難受的對白。最慘阿樂等遭到軟禁，成為「被壓抑的情緒」，見證韋莉變成另一個人，唔好啦。
全片有大量反思位，包括阿樂的覺悟，明白唔應該將負面記憶波封存，所有情緒都有用，唔需要否定自己嘅過去。另外，提供解決焦慮的最好方法就係好好照顧佢，最重要唔好同自己過唔去，接受全部的自己，再成為更好的自己。
頭條戲場
同樣出鏡唔多，但好得意。
佢就係曲棍球隊前輩，韋莉為接近佢不斷改變自己。
阿樂終於接受阿愁，因為明白成長就係要學習擁抱不同情緒的自己。
韋莉本來好快樂，但被新情緒搞到不斷懷疑自己。
阿厭出鏡唔多，如果同阿焦中和返啲，韋莉就唔使咁慘。
搞到韋莉失晒控，好內疚又扁晒嘴的阿焦話「我只係為佢好」。
因韋莉仲細，好過癮的「念舊姐」只出現兩幕便被阿樂趕走。
最愛呢幕，所有情緒專員攬攬大和解，大家都辛苦嘞。
最Hit
47歲婦常飲1種湯 腦出血中風亡！長期飲恐致癌？醫生揭4大風險
2024-12-09 13:48
深圳菊花展2024｜深圳3大菊花展12月開鑼 免費入場賞逾12萬株菊花花海 附交通攻略
2024-12-10 19:14
更多文章
