頭條戲場 - 《男航女機師》黐線笑死我 | 頭條戲場
頭條戲場
2024-08-20 02:00 HKT
字體大小
全片110分鐘，笑咗90分鐘，當中包含小笑、大笑、翻笑同埋笑到係咁拍朋友隻手，香港好多導演都話拍笑片好難，但韓國啲笑片真係好癲，好笑之餘，笑料仲要好高質，點做到？此片內容有關男人扮女人，易容玩足電影8成時間，即係咁，如果你覺得男扮女點可能呃到人？又或者睇親戲都邏輯L上身，呢套戲未必啱你睇嘞。（剛上映） 撰文：廖思慧
電影屬大癲級爆笑喜劇，由搞笑好叻的曹政奭主演，一直知佢勁，劇集、電影、舞台劇、音樂劇，唱埋OST之餘，仲要有獎攞，真係瓣瓣掂。戲中飾演韓正優，本是深受市民追捧的明星機長，電影以他的受訪片段作故事開首，然後因為衰多口由天堂跌落地獄，事業愛情兩失意，衰開有條路，雙失中佬更慘被航空界列入黑名單，身邊的擦鞋仔全部走晒，更風水輪流轉，要做「契弟」求幫忙，喜劇難得含警世意味。
唔好買嘢食入場
為了再揸飛機，韓正優決定富貴險中求，請求美妝KOL細妹韓正美（韓善伙飾）幫手，化靚妝兼裝假胸再着返對高踭鞋，然後冒充妹妹應徵機師竟順利獲取錄，笑到黐線癲狂劇情就此展開，期間有大量危險位，會好驚「A貨韓正美」因大意而穿煲，全程keep住又驚險又好笑，買咗爆谷入場應該食唔到，要留意返。
為了減輕佬味，曹政奭拍攝前努力減去15磅，加上天生有對纖瘦靚腿，着短裙真心好睇，狗公同事徐賢錫（申承浩飾）睇到發晒光，更因男扮女初期未熟習着裙禮儀而鬧出好多笑話，狗公同事更誤以為「A貨韓正美」嘅所有大意走光都係刻意引誘佢，哈哈哈哈哈。最後要讚翻譯，字幕抵死又貼地，有「脆」、「提子」及「大癲」等，同劇情勁夾，睇得好開心。
頭條戲場
收到成堆繳費通知書，韓正優把心一橫扮女搵食。
「A貨韓正美」越做越受歡迎，步真身後塵做埋星級機師拍廣告。
「A貨韓正美」嘅狗公同事徐賢錫，亦曾是韓正優的擦鞋仔。
韓正優本是星級機長，有錢又有面，但衰多口被炒後一沉百踩。
老婆嗌離婚，工又冇埋，好彩韓正優仲有個仔。
韓正優個妹，韓正美真身，都係癲嘅，韓善伙做白卡妹真係一流。
「A貨韓正美」開工要扮聲又要舉止斯文，經常徘徊穿煲之間，好好笑。
「A貨韓正美」着花裙仔出街，獲叫靚女超興奮。
最Hit
TVB兩位首席主播同時離巢？任職20年才子疑似移民 凍齡女神久未露面公布噩耗
2025-02-10 17:30 HKT
長者優惠2025｜135大樂悠咭/長者咭食買玩折扣！海洋公園免費入場/配眼鏡減$600/美心MX晚市7折
2025-02-10 15:39 HKT
更多文章
