古星輝 - 首季5G智能手機 AI助力發威 | 乜都5G
古星輝
2024-04-26 02:00
字體大小
市場研究公司IDC剛公布了本年首季全球智能手機嘅成績表，一齊研究有何亮點。
今年首季全球智能手機出貨量上升7.8%，達到2.894億部，已經係連續第3個季度錄得升幅，證明經歷晶片及疫情挑戰後，智能手機產業已逐漸回到正軌。報告亦表示，由於近年消費者明白佢哋使用智能手機嘅時間會更長，而手機亦變得更加耐用，所以傾向選擇一啲中高檔次，甚至旗艦級手機。中高檔次型號銷量提升，導致智能手機嘅平均銷售價有所增長。
至於品牌方面嘅表現，近年都係蘋果及三星兩大巨擎嘅天下，隨着三星喺今年首季推出以AI做主打嘅旗艦系列，令品牌登上首季出貨冠軍，市佔率為20.8%，而蘋果則以17.3%位列亞軍。OPPO等內地品牌亦表現理想，躋身首季全球五強之列。
智能手機植入AI添動力
去年底Google已於其智能手機加入AI技術，而有品牌更會陸續透過軟件更新，將AI功能下放至其他旗艦手機，或會為舊型號增添銷售動力；而另一內地品牌華為剛剛推出嘅旗艦系列，亦加入咗多項AI操控及智慧應用，當中AI改圖功能近日更成為網上熱話。呢款手機喺內地掀起一陣搶購潮，上周推出創下開賣一分鐘秒殺嘅成績。此外，網傳新一代iOS亦會加入AI功能，孰真孰假，果粉們拭目以待。
每逢新手機上市，不少人路經電訊商及專門店，總會拿上手試玩一下，可見新手機對消費者仍是有一定吸引力。如今廠商陸續於手機加入AI功能，無論拍攝表現及操作效能皆有所提升，相信好快又會有新一輪換機熱潮。
和記電訊香港執行董事及行政總裁
古星輝
更多文章
