古星輝 - 打擊騙案 助銀髮族數碼共融 | 乜都5G
![「短訊發送人登記制」現已實施。](https://image.hkhl.hk/f/686e386/0x0/100/none/52db72a4cabfae28be2e95a0ee664158/2024-05/WNB02P01030524_copy.jpg)
兩年前(2022年),65歲或以上嘅老友記當中,有超過九成擁有智能手機。由此可見,社會不斷發展,年長一輩無論係甘心樂意或逼於無奈,都要融入數碼生活,很難再與科技沾不上邊。
尤其係5G嘅出現,有助推動樂齡科技及數碼應用嘅發展,例如提升復康設備嘅功能,以及喺遙距醫療嘅應用等。當大眾都致力擁抱數碼發展,講求創新,追趕科技,與此同時,我哋更應該包容及照顧老友記,幫助佢哋解決融入數碼生活所面對嘅問題。
60歲以上可享免費「來電管理組合」
去年香港嘅詐騙案就有約4萬宗,其中電話騙案佔約8%。我哋不時聽到新聞話有老友記被騙去畢生積蓄,真係聽到都心痛。有數據預期於2046年,65歲及以上人士佔整體香港人口比例將上升至約4成。面對人口老化,我哋除咗鼓勵長者使用科技,與時並進外,大前提係令老友記安心應用科技,避免跌入陷阱。
作為電訊商,我哋當然身體力行,大力支持當局加強宣傳打擊電騙,讓長者提高警惕。我哋喺門巿擺放防騙單張、播放防騙短片,以及喺社交媒體加強教育,大家同心合力,提高長者嘅防騙意識,亦營造守望相助嘅氣氛。
我哋全力為年長客戶提供實質幫助,例如免費提供可以攔截詐騙來電及自訂來電黑名單嘅「來電管理組合」。最近我哋就將受惠年齡由65歲下調至60歲,等更多長者受惠,合資格客戶親臨門巿申請即可。
一「#」辨真偽
另外,我哋亦加入咗當局嘅「短訊發送人登記制」,成為獲認證發送人,幫助客戶辨別發送人身份,防範短訊詐騙。依家大家見到由「#3HK」、「#3Business」、「#3HKRoam」或「#3HKBill」等鑿住個「#」號發送人嘅短訊,就可以放心喇。
目前參加咗呢個計劃嘅機構包括電訊公司、銀行、政府機構,以至攝影器材公司、保險公司、速遞公司等,認住個「#」號,有助辨別短訊發送人身份。例如#LCSD_HKPL係康樂及文化事務署香港公共圖書館,而#ADCC18222係反詐騙協調中心,想知多啲可以參閱SMS Sender Registration Scheme SMS Sender Registry(ofca.gov.hk)。
當社會不斷進步,我哋每日勇往直前嘅時候,大家都應該不時停一停,幫一幫我哋身邊嘅老友記,達至數碼共融。
和記電訊香港執行董事及行政總裁
古星輝