古星輝 - 5G AI電動單車 全天候開Live | 乜都5G
![5G電動單車的功能多樣化,令出行更多姿多采。](https://image.hkhl.hk/f/686e386/0x0/100/none/07cd594f837b3a99a470fe71e22b09e0/2024-05/WNB02P01100524_.jpg)
電動汽車內置上網功能已經不是新鮮事,估唔到呢股潮流即將去到電動單車。早前一間廠商宣布即將推出全球首部5G電動單車,結合AI物件偵測功能,為交通工具寫下新標準。
內置SIM卡嘅單車,喺幾年前推出NB-IoT嘅時候曾經出現過,當時主要用嚟輔助定位。至於呢部5G電動單車,外型上同其他電動單車分別唔大,不過加入5G連線就令佢嘅功能更多樣化。
呢部單車「麻雀雖小,五臟俱全」,車身前方配備6400萬像素鏡,另有800萬像素自拍鏡頭,車尾就有一個200萬像素鏡頭,可視角度達140度,配合AI傳感器可以監察附近交通情況,佢嘅AI預判功能更可偵測附近物件及防止碰撞,適時向車主發出提示,令車主踩單車時可以更放心。路上駕駛最重要安全,呢部電動單車喺安全方面交足功課,當車主未戴上頭盔嘅時候,單車會發出提示,甚至唔戴頭盔唔會畀車主開車,一於安全至上。
一站式開live直播單車旅程
呢部電動單車前面有個7吋螢幕,就好似汽車嘅儀錶板一樣,提供車速、距離、電池狀態等資料,連導航功能都係靠佢。平日喺YouTube見到唔少單車友鍾意喺單車加部運動相機拍片,坐呢部電動單車就唔使咁論盡,車前嘅高清鏡頭嘅影像,可以透過車身內置5G傳送上網,隨時開Live直播美好風光。而車主又可以用自拍鏡頭同其他人視像通話,如果係同其他單車友組隊出行,仲可以喺螢幕上見到隊友位置,達至車與車之間嘅聯繫。
另一個實用嘅功能,就係車主可以透過應用程式去鎖車或者解鎖,甚至以GPS追蹤位置及設定路線限制。有時去到郊外想玩吓休息吓,單車嘅5G仲可以化身流動Wi-Fi,方便不同裝置連線上網。
將5G植入單車的確有新意,令出行更多姿多采。日後電動單車喺香港合法化之後,期望喺路上可以見到呢款5G電動單車。
和記電訊香港執行董事及行政總裁
古星輝