古星輝 - 5G「耆」想 | 乜都5G
人口老齡化係唔少社會面對嘅問題，以香港為例， 有預測話到咗2046年，每3個人就有1個係65歲或以上；到咗2050年，超過4成人口會喺65歲或以上，屆時香港將成為全球人口老化程度最高嘅城市之一。人老咗，難免需要更多支援，更多陪伴。面對呢股沉重嘅社會壓力，除咗輸入外勞，結合5G通訊普及樂齡科技，可望紓緩相關問題。
要普及樂齡科技，先要有可靠嘅電訊基建，香港嘅商用5G服務已覆蓋超過9成人口。早前政府亦已立例建議新建樓宇，須預留空間比電訊商擺放流動通訊設施，方便進一步擴大5G網絡。
最近留意到古洞北新發展區內，落成啟用不久嘅福利服務綜合大樓，就特別預留咗流動電訊設備機房俾電訊商擺放5G基礎設施，體現咗流動通訊同水電煤等公用事業一樣重要嘅角色。該大樓有7間安老院舍及兩間嚴重傷殘院舍，可容納約1800人；有好嘅5G基建，可協助安老及復康機構打造智能家居系統及採用樂齡科技設施，提升老友記及院友嘅生活質素。
樂齡科技助長者復康
要開展「智慧安老院舍」，除咗有良好嘅通訊基建外，亦要物色合用嘅樂齡科技應用方案配合，呢啲方案一般以三個目標為主：第一是改善長者生活質素。智能機械人喺呢方面大派用場，不但可於院舍負責接待、清潔及巡房，機械人及機械寵物更可陪伴老友記，同佢哋互動，並且支援虛擬探訪服務。
第二是幫助長者復康，例如建立智能健康管理系統及提供遙距視像醫療服務等。樂齡應用方案還可配合擴增實景，透過遊戲和運動，加強長者嘅肌肉訓練，改善手眼協調。另一方面，使用5G虛擬實景，亦有助中風或認知障礙患者治療復康，重新探索社區。凡此種種，皆有助紓緩護理員及照顧者嘅壓力。
第三是健康風險評估及預防疾病。樂齡科技配合5G，能打造最強嘅物聯網。還記得第一代嘅智能防跌枴杖嗎？時至今日，喺洗手間、浴室，以至睡加設感應器，裝設跌倒警報系統，當偵測到長者有危險時，能立即通知院舍工作人員或照顧者，保障老友記安全。
香港舉行咗樂齡科技博覽暨高峰會多年，期待喺下半年見到更多新嘅樂齡科技出現。加埋我哋電訊商一齊幫手，老友記就可以「智慧養老」，安享晚年。
和記電訊香港執行董事及行政總裁
古星輝
